ގިނަ ކުލަބުތަކަކަށް ކުޅެފައިވާ ލުކާކޫ 400 ގޯލު ހަމަކޮށްފި

ޔޫރަޕްގެ ގިނަ ކްލަބުތަކަކަށް ކުޅެފައިވާ ރޮމޭލޫ ލުކާކޫ އޭނާގެ ކެރިއަރުގައި 400 ގޯލު ހަމަކޮށްފިއެވެ. ފުޓުބޯޅައިގެ ތާރީޙުގައި ލުކާކޫ ރަން ސަފްޙާއެއް ލިޔުނުއިރު ގިނަ ކްލަބުތަކަށް ކުޅެފައިވުމީ، ހާލަތަށް ހޭނުމަށް އޭނާގެ ފަރިތަކަން އަންގައިދޭ މުހިންމު ސިފައެކެވެ.

ކެރިއަރުގެ މި ކާމިޔާބީ އުމުރުން 31 އަހަރުގެ ލުކާކޫ ހާސިލްކޮށްފައިވަނީ ރޭ އޭސީ މިލާން ކޮޅަށް ޖެހި ޙާއްސާ ގޯލާއެކުއެވެ. ރޭ ނަޕޯލީން މިލާން 2-0 އިން ބަލިކުރި މެޗުގައި ލުކާކޫ ކާމިޔާބުކުރީ އެ ޓީމުގެ ދެވަނަ ގޯލެވެ. އަދި މި ސީޒަނުގައި މިހާތަނަށް 11 ގޯލު ކާމިޔާބުކޮށްފައިވުމުގެ އިތުރުން، އޭނާ ވަނީ 9 އެސިސްޓު ވެސް ކޮށްދީފައިވެއެވެ.

ޤައުމީ ޓީމަށް 88 ގޯލު ކާމިޔާބުކޮށްދީފައިވާއިރު، ކްލަބް ލެވެލްގައި މިހާތަނަށް ލުކާކޫ ވަނީ 312 ގޯލު ކާމިޔާބުކޮށްފައެވެ. 

ލޫކާކޫގެ ކެރިއަރުގައި ނަޕޯލީގެ އިތުރުން 7 ކްލަބަކަށް ކުޅެފައިވާއިރު، މީގެ ތެރޭގައި ބްލެޖިއަމްގެ ޓީމަކާއި، އިނގިރޭސިވިލާތުގެ 4 ޓީމުގެ އިތުރުން ދެން ހިމެނެނީ ނަޕޯލީއާއެކު 3 ޓީމެވެ. 

ލުކާކޫ ގޯލުތައް ކާމިޔާބުކޮށްފައިވާ ކްލަބްތައް:

• އިންޓަ މިލާން – 78 ގޯލު
• މެންޗެސްޓަރ ޔުނައިޓެޑް – 42 ގޯލު
• އެވަޓަން – 87 ގޯލު
• ރޯމާ – 21 ގޯލު
• ޗެލްސީ – 15 ގޯލު
• ވެސްޓް ބްރޮމްވިޗް އަލްބިއޮން – 17 ގޯލު
• އެންޑަލެޗް – 41 ގޯލު

މި ކާމިޔާބާ ގުޅިގެން ވާހަކަ ދައްކަމުން ލުކާކޫ ބުނީ، 400 ގޯލަކީ ވަރަށް ގިނަ ގޯލު ކަމަށާއި، ނަމަވެސް ރޭ މުހިންމުވީ ރޯމާ ބަލިކުރެވުން ކަމަށެވެ. މެޗު އޮތް ދުވަހު ކޯޗުގެ ރޭވުމަށް ގެނައި ބަދަލާއެކީ، މިލާން ބަލިކުރަން އުނދަގޫވި ކަމަށާއި، ނަމަވެސް 3 ޕޮއިންޓު ލިބުމުން ހިންހަމަޖެހުނުކަމަށް އޭނާ ބުންޏެވެ. 

އޭސީ މިލާން ބަލިކުރުމުން ނަޕޯލީ އާއި ލީގުގެ އެއްވަނައިގައި އޮތް އިންޓަ މިލާންއާ ދެމެދު މިހާރު އޮތީ 3 ޕޮއިންޓުގެ ފަރަގެކެވެ.