މިއަހަރުގެ ޢީދު ބައިބަލާ ޗެލެންޖު މާދަމާ ރޭ ފެށުމަށް ތައްޔާރުވެއްޖެ

ކޮންމެ އަހަރެއްގެ ވެސް ފިޠުރު  ޢީދާއި ދިމާކޮށް ބާއްވަމުން ގެންދާ "ޢީދު ބައިބަލާ ޗެލެންޖު" މާދަމާ ރޭ ފެށުމަށް ބައިބަލާ އެސޯސިއޭޝަނުން ތައްޔާރުވެއްޖެއެވެ.

މި މުބާރާތަކީ ރާއްޖޭގެ ޒުވާނުންގެ މެދުގައި ވަރަށް ފޯރިގަދަ އަދި އެހާމެ މަޤުބޫލު މުބާރާތެކެވެ.  ބައިބަލާ އެސޯސިއޭޝަނުން މަޢުލޫމާތުދޭ ގޮތުގައި މިއަހަރުގެ މުބާރާތުގައި ޖުމްލަ 29 ޓީމަކުން ވާދަކުރާނެއެވެ. އަދި މިހާރު މި މުބާރާތުގެ ގުރުއަތުލުން ބާއްވާފައިވާކަމަށް އެ އެސޯސިއޭޝަނުން މަޢުލޫމާތުދެއެވެ.

މި މުބާރާތުގެ ފުރަތަމަ މެޗުގައި ވާދަކުރާނީ، މިދިޔަ އަހަރުގެ މުބާރާޔުގެ ޗެމްޕިއަން ޓީމް ބުރު ސްޕޯޓްސް ކުލަބާއި ޓީއެފްޓީއެވެ. އަދި 2 މެޗުގައި ދަ ބޯސް ސްޕޯޓްސް ކުލަބާއި ޓީއެފްޓީ ވަކަރުގެ ވާދަކުރާއިރު، 3 ވަނަ މެޗުގައި ވާދަކުރާނީ މިދިޔަ އަހަރުގެ ރަނަރަޕް ކުލަބް ކާސިންޖީ އާއި ޓީނޭޖް ވެޓަރެންސް ކަމަށް ބައިބަލާ އެސޯސިއޭޝަނުން ވަނީ ބުނެފައެވެ.

މީގެ އިތުރުން އެ އެސޯސިއޭޝަނުން ބުނީ، މާދަމާ ރޭ މި މުބާރާތުގެ ޖުމްލަ 6 މެޗު ކުޅެވިގެންދާނެ ކަމަށެވެ. އެގޮތުން މުބާރާތުގެ 4 ވަނަ މެޗުގައި ވާދަކުރާނީ ޖަނަވަރީ ސްޕޯޓްސް ކުލަބާއި ލިޓްލް ޓައުންއެވެ. އަދި 5 ވަނަ މެޗުގައި ކުޑަހެންވޭރު ޔުނައިޓެޑް އަދި ބީޖީ ނިއުޖެނެރޭޝަން ވާދަކުރާއިރު، މާދަމާ ރޭ ގެ ފަހު މެޗުގައި ވާދަކުރާނީ އެލްޓީ ސްޕޯޓްސް ކުލަބާއި ކާސިންޖީއެވެ.

މި މުބާރާތުގެ މެޗުތައް ކުރިއަށްދާނީ، ހުޅުމާލެ ފޭސް 1 ގައެވެ.  އަދި މުބާރާތް ފެށުމުގެ އެންމެ ފަހުގެ ތައްޔާރީތައް މިހާރު ވަމުންދާކަމަށް ބައިބަލާ އެސޯސިއޭޝަނުން ވަނީ ބުނެފައެވެ.