ހުޅުމާލޭގައި ހިންގި އިންސްޕެކްޝަނުގައި 769 ބިދޭސީއަކާ ސުވާލުކޮށްފި!

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ހޯދުމަށް މޯލްޑިވްސް އިމިގްރޭޝަނުން ހިންގަމުންދާ އިންސްޕެކްޝަން ތަކުގެ ދެވަނަ އިންސްޕެކްޝަންގެ ދަށުން ހުޅުމާލެ އަދި ހުޅުމާލެ ދެވަނަ ފިޔަވަހީގައި އިއްޔެ ފެށި އިންސްޕެކްޝަންގައި 769 ބިދޭސީއަކާއި ސުވާލު ކުރެވިފައިވާ ކަމަށް އިމިގްރޭޝަނުން ބުނެފިއެވެ. 

އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ ރާއްޖޭގައި ޤަވާއިދާ ޚިލާފަށް ވިޔަފާރިކޮށް، ޞައްޙަ ވިސާ ނެތި އުޅެމުންދާ ބިދޭސީން ބަލައި ފާސްކުރުމަށް އިއްޔެ ހުޅުމާލޭގައި ހިންގި މާސް އިންސްޕެކްޝަންގައި ޖުމްލަ 314 ތަން ބަލައި ފާސްކޮށް 769 ބިދޭސީންނާ ވަނީ ސުވާލުކޮށްފައި ވާ ކަމަށެވެ.

https://twitter.com/ImmigrationMV/status/1840661780194091344

ސުވާލުކުރެވުނު ބިދޭސީންގެ ތެރެއިން ޤަވާއިދާ ޚިލާފަށް އުޅޭ ބިދޭސީންނާއި ފިލައިގެން އުޅޭކަމަށް ރިޕޯޓުކޮށްފައިވާ ބިދޭސީން ހިމެނޭހެން 28 މީހަކު ވަނީ އިމިގްރޭޝަން ބެލުމުގެ ދަށަށް ގެނެވިފައި ކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަން ކޮންޓްރޯލަރ ޝަމްޢާން ވަޙީދާއި ޑެޕިޔުޓީ ކޮމިޝަނަރ އަޙްމަދު އަޝްްފާން ވެސް ޢަމަލީ ގޮތުން މި އިންސްޕެކްޝަންގައި ބައިވެރިވެވަޑައިގެންފައިވެއެވެ.

އިމިގްރޭޝަންގެ 200 އޮފިސަރުން ބައިވެރިވި މި އިންސްޕެކްޝަންގައި ފުލުހުންގެ ޚިދުމަތާއި، އިކޮނޮމިކް މިނިސްޓަރީއާއި، އެޗްޕީއޭ އަދި އެމްއެފްޑީއޭ އިން ވެސް ބައިވެރިވެވަޑައިގެންފައިވެއެވެ.