އިސްރާއީލުން ބެއިރޫތަށް ވައިގެ ހަމަލާ ތަކެއް ދީފި

އިސްރާއީލުން ބެއިރޫތުގެ ދެކުނު ސަރަޙައްދަށް ދިން ވައިގެ ހަމަލާއެއްގައި މަދުވެގެން 3 މީހުން މަރުވެ، 7 މީހުން ޒަޚަމްވެއްޖެކަމަށް ލުބުނާންގެ ސިއްޙީ ވުޒާރާއިން މިއަދު  ހެނދުނު ބުނެފިއެވެ. މި ހަމަލާއާ ގުޅިގެން އިސްރާއީލާއި ހިޒްބުއްލާއާ ދެމެދު ވެފައިވާ 4 މަސްދުވަހުގެ ހަނގުރާމަ ހުއްޓުމުގެ އެއްބަސްވުން ނާޒުކު ހާލަތަކަށް ވަނީ ގޮއްސައެވެ.

އިސްރާއީލުގެ ސިފައިންގެ ބަޔާނެއްގައި ބުނެފައިވަނީ، މި ހަމަލާ އަމާޒުކޮށްފައިވަނީ ހަމާސްގެ ހަރަކާތްތެރިންނަށް އެހީތެރިވެދީ، އެމީހުންނަށް އިރުޝާދު ދެމުން އައި ހިޒްބުއްލާގެ ހަނގުރާމަވެރިއަކަށް ކަމަށެވެ. ނަމަވެސް މި ހަމަލާގެ އަމާޒަކީ ކާކުކަން ހިޒްބުއްލާއިން އަދި ހާމަކޮށްފައެއް ނުވެއެވެ.

ރޯއިޓަރސްގެ ނޫސްވެރިއަކު ބުނާ ގޮތުގައި މި ހަމަލާގައި ބެއިރޫތުގެ ދެކުނު ސަރަޙައްދުގައި ހުރި އިމާރާތެއްގެ މަތީ ތިން ފަންގިފިލާއަށް ގެއްލުން ލިބި، އެ ފަންގިފިލާތަކުގެ ބެލްކަނިތައް ވަނީ ފުނޑުފުނޑުވެފައެވެ. މި ސަރަޙައްދަކީ ހިޒްބުއްލާގެ ނުފޫޒު ބޮޑު ސަރަޙައްދެއް ކަމަށްވާ ދަހިޔާ އެވެ. ހެކިންގެ ބަހުން އެނގޭ ގޮތުގައި މި ހަމަލާގެ ކުރިން އެ ސަރަޙައްދު ހުސްކުރުމަށް އެއްވެސް އިންޒާރެއް ދީފައެއް ނުވެއެވެ. އަދި ހަމަލާއަށްފަހު ގިނަ އާއިލާތަކެއް ވަނީ ބައިރޫތުގެ އެހެން ސަރަޙައްދުތަކަށް ގޮއްސައެވެ.

މި ހަމަލާ އައިސްފައިވަނީ ޣައްޒާގައި އިސްރާއީލުން ހަނގުރާމަ އަލުން ފެށުމަށްފަހުގައެވެ. އިސްރާއީލުން ބުނާ ގޮތުގައި ހަމާސްއިން ހަތިޔާރު ދޫކޮށްލަންދެން މި ހަނގުރާމަ ކުރިއަށް ގެންދާނެއެވެ. ނޮވެމްބަރު މަހު ވެވުނު ހަނގުރާމަ ހުއްޓުމުގެ އެއްބަސްވުމުގައި ވާގޮތުން ދެކުނު ލުބުނާނުގައި ހިޒްބުއްލާގެ ހަނގުރާމަވެރިންނާއި ހަތިޔާރު ނުބޭއްވުމަށާއި، އެ ސަރަޙައްދުގައި ލުބުނާނުގެ ސިފައިން އަތުރާލުމަށާއި، އިސްރާއީލުގެ އެއްގަމު ސިފައިން އެ ސަރަޙައްދުން ފޭބުމަށް އެއްބަސްވެފައިވެއެވެ. ނަމަވެސް މި އެއްބަސްވުމުގެ ޝަރުތުތައް ފުރިހަމައަށް ތަންފީޒު ނުކުރާކަމަށް ދެފަރާތުން އެއްފަރާތް އަނެއް ފަރާތަށް ތުހުމަތުކުރެއެވެ.