ދުނިޔެ
އިސްރާއީލުން ދިން ހަމަލާއެއްގައި ފަލަސްޠީނުގެ ނޫސްވެރިއަކާއި އޭނާގެ ޢާއިލާ ޝަހީދުކޮށްލައިފި
ފަލަސްޠީނުގެ ނޫސްވެރިންތަކަކަށް އިސްރާއީލުގެ ސިފައިން އަނިޔާކުރަނީ/ފޮޓޯ: ވަފާ
ޔަހޫދީ އިސްރާއީލުގެ ސިފައިން ފަލަސްޠީނުގެ ޣައްޒާއަށް ދިން ޙަމަލާއެއްގައި، ފަލަސްޠީނުގެ ނޫސްވެރިއަކާއި އޭނާގެ ޢާއިލާ ޝަހީދުކޮށްލައިފިއެވެ.
ޤުދުސް މީޑިއާ ރިޕޯޓްކޮށްފައިވާ ގޮތުގައި، ޝަހީދުކޮށްލާފައިވަނީ މުހައްމަދު ސަލާހް އަލް-ބަރްދަވީލް ނަމަކަށް ކިޔާ ނޫސްވެރިއެކެވެ. އަދި އޭނާއާއި އެކު، އޭނާގެ އަނބިމީހާއާއި އޭނާގެ ތިން ކުދިން ވެސް ވަނީ ޝަހީދުކޮށްލާފައެވެ. މީގެ އިތުރުން މި ނޫހުން ރިޕޯޓުކޮށްފައިވާ ގޮތުގައި، މި ޙަމަލާގައި މުހައްމަދު ސަލާހް އަލް-ބަރްދަވީލް އަދި އޭނާގެ ޢާއިލާ ޝަހީދުކޮށްލާފައިވަނީ ޚާން ޔޫނިސްގައި ހުންނަ އެމީހުންގެ ގެއަށް އަމާޒުކޮށް ރޭގެ ވަޤުތެއްގައި ދިން ޙަމަލާއެއްގައި ކަމަށެވެ.
މުހައްމަދު ސަލާހް އަލް-ބަރްދަވީލް އަކީ، ފަލަސްޠީނުގެ ކޮން ނޫހެއްގައި މަސައްކަތްކުރާ ނޫސްވެރިއެއް ކަމެއް މިހާތަނަށް ކަށަވަރުވެފައެއް ނުވެއެވެ. ނިރުބަވެރި އިސްރާއީލުން ވަނީ މީގެ ކުރިން ވެސް ފަލަސްޠީނުގެ އެތަކެއް ނޫސްވެރިންނެއް ޝަހީދުކޮށްލާފައެވެ. އަދި މިހާރު ވެސް އިސްރާއީލުން ދަނީ ޣައްޒާގެ ނޫސްވެރިންނަށް އަމާޒުކޮށް އެތަކެއް ޙަމަލާތަކެއް ދެމުންނެވެ. މިކަމުގެ އެންމެ ބޮޑު އެއް ސަބަބަކީ، ޣައްޒާއަށް ދެމުން ގެންދާ ޙަމަލާތައް މުޅި ދުނިޔެއަށް އާންމުކުރުން ހުއްޓުވުންކަމަށް ބެލެވެއެވެ.
عاجل | استشهاد الصحفي محمد صالح البردويل وزوجته وأبنائه جراء استهداف طائرات الاحتلال لشقته في مدينة خان يونس، جنوب قطاع غزة. pic.twitter.com/R7MEXsevQS
— شبكة قدس الإخبارية (@qudsn) March 31, 2025
