ދުނިޔެ
އިސްރާއީލުން ލުބުނާނަށް ދެމުންދާ ހަމަލާތަކުގެ ފަހަތުގައިވާ ސަބަބު

ލުބުނާނަށް ހަމަލާ އަމާޒުވެފައިވާ ތަނެއް ފޮޓޯ:އިންޓަރނެޓް
ވޮޝިންގްޓަން ޑީސީގެ ނޭޝަނަލް ޑިފެންސް ޔުނިވަރސިޓީގެ ޕްރޮފެސަރ ޑޭވިޑް ޑެސް ރޯޗްސް ވިދާޅުވެފައިވަނީ އިސްރާއީލުން ލުބުނާނަށް ދެމުންދާ ހަމަލާތަކުގެ މައިގަނޑު ސަބަބަކީ ހިޒްބުއްލާ "އެފެކްޓިވް މިލިޓަރީ އޯގަނައިޒޭޝަނެއްގެ" ގޮތުގައި ނައްތާލުމަށް ކަމަށެވެ.
އަލް ޖަޒީރާއަށް ދެއްވި އިންޓަވިއުއެއްގައި ޑެސް ރޯޗްސް ވިދާޅުވި ގޮތުގައި، ކުރީގައި އިސްރާއީލަށް ލުބުނާނަށް ހަމަލާދިނުމުގެ މިނިވަންކަން ލިބިފައިވަނީ ހިޒްބުއްލާއިން ޖަވާބުދާރީވުމުގެ ޤާބިލުކަން އޮތް މިންވަރަކުންނެވެ. ނަމަވެސް މިހާރު ހިޒްބުއްލާގެ ސަޕޯޓް ބޭސް އަދި ސީރިއާގައި ހުރި އިރާނުގެ އިސްލާމިކް ރެވޮލިއުޝަނަރީ ގާޑް ކޯޕްސްގެ މައިގަނޑު ސަޕޯޓް ބޭސް ނައްތާލެވިފައިވާތީ، ހިޒްބުއްލާގެ ކޮމާންޑް ފެސިލިޓީތަކާއި ހަތިޔާރު ފެސިލިޓީތަކަށް ހަމަލާދިނުމުން އެއްވެސް މިލިޓަރީ އަގެއް ދައްކަން ނުޖެހޭނެ ކަމަށް އިސްރާއީލުން ދެކޭ ކަމަށް އޭނާ ވިދާޅުވިއެވެ.
އެހެންނަމަވެސް، ޑެސް ރޯޗްސް އިތުރަށް ވިދާޅުވި ގޮތުގައި، ޣައްޒާއާ އަޅާބަލާއިރު ލުބުނާނުގައި ހުއްޓުމަކަށް އައިސްފައިވާ ހަނގުރާމަ އަލުން ފެށުމަށް އިސްރާއީލަށް އެހާ ފަސޭހައެއް ނުވާނެއެވެ. މީގެ ސަބަބެއްގެ ގޮތުގައި އޭނާ ފާހަގަކުރެއްވީ ލުބުނާނުގައި ބައިނަލްއަޤްވާމީ އެހީތެރިކަން ލިބިފައިވާ ސަރުކާރެއް އޮތުމާއި، އެ ސަރުކާރަކީ ހިޒްބުއްލާގެ ބަދަލުގައި އޮތް އޮޕްޝަނެއް ކަމުގައި ވުމެވެ. އަދި ޣައްޒާގައި ހަމާސްގެ އިތުރުން އެހެން ބަދަލެއް ނެތް ކަމަށްވެސް އޭނާ ވިދާޅުވިއެވެ.
އިސްރާއީލާއި އެމެރިކާ ބޭނުންވަނީ ލުބުނާނު ސަރުކާރުން އެ ޤައުމުގެ މައްޗަށް ސިޔާދަތު ޤާއިމުކޮށް، ކުރީގެ "ދައުލަތެއްގެ ތެރޭގައި އޮތް ދައުލަތް" އަލުން އުފެދުނަ ނުދިނުމަށް ކަމަށްވެސް ޑެސް ރޯޗްސް ވިދާޅުވިއެވެ.