މެލޭޝިއާގެ އަލިފާނުގެ ހާދިސާއެއް ހިނގައި، 100 އަށްވުރެ ގިނަ މީހުން ޒަޚަމްވެއްޖެ

ކުއާލަލަމްޕޫރު ކައިރީގައި އޮންނަ ސެލަންގޯރު ސްޓޭޓުގައި އީދު ދުވަހު ހިނގި ބޮޑު އަލިފާނުގެ ހާދިސާއެއްގައި 100 އަށްވުރެ ގިނަ މީހުން ޒަޚަމްވެ، ގިނަ އަދަދެއްގެ މީހުން ގެދޮރު ދޫކޮށް ދާން މަޖުބޫރުވެއްޖެއެވެ. މި ހާދިސާ ހިނގާފައިވަނީ މެލޭޝިއާގެ ސަރުކާރުގެ ކުންފުންޏެއް ކަމަށްވާ ޕެޓްރޯނާސްގެ ގޭސް ހޮޅިއަކުން ލީކުވުމުގެ ސަބަބުންނެވެ.

ސެލަންގޯރު ސްޓޭޓުގެ ފަޔަރ އޮފިޝަލުން ބުނާ ގޮތުގައި މި ހާދިސާ ހިނގާފައިވަނީ 500 މީޓަރުގެ ދިގުމިނުގެ ގޭސް ހޮޅިއަކުން ލީކުވުމުގެ ސަބަބުންނެވެ. އަލިފާން ރޯވެފައިވާ ސަރަހައްދުގެ ވަށައިގެން ހުރި ގެތަކުގެ ތެރެއިން 50 އެއްހާ ގެއަށް ގެއްލުން ލިބިފައިވާ ކަމަށް ފަޔަރ ޑިޕާޓްމަންޓުން ބުނެފައިވެއެވެ.

ޒަޚަމްވި މީހުންގެ ތެރެއިން 60 އެއްހާ މީހުން ވަނީ ހޮސްޕިޓަލަށް ގެންދެވިފައެވެ. ނަމަވެސް މި ހާދިސާގައި މަރުވި މީހަކު ނެތް ކަމަށް ސެލަންގޯރު ޑެޕިއުޓީ ޕޮލިސް ޗީފް މުޙައްމަދު ޒައިނީ އަބޫ ހަސަން ވަނީ ބުނެފައެވެ.

މި ހާދިސާ ހިނގި ވަގުތު އެ ސަރަހައްދުގެ ރައްޔިތުން ތިބީ އީދު އުފާ ފާހަގަކުރުމުގައެވެ. ހާދިސާ ހިނގި ސަރަހައްދާ 100 މީޓަރު ދުރުގައި ދިރިއުޅޭ 49 އަހަރުގެ ނިޒާމް މުޙައްމަދު އަސްނިޒާމް ބުނި ގޮތުގައި އޭނާ ހޭލި އިރު ފެނުނީ ބިރުވެރި އަޑަކާއެކު އަލިފާން ރޯވެފައިވާ މަންޒަރެވެ. "އަޑު އިވުނީ ޖެޓް އިންޖީނެއް ޖެހިފައި ހުރި ކަހަލަ ގޮތަކަށް. ބިންމަތީގައި ފައިޖެހުނީ ހޫނު ތަޅުމެއްގައި ފައިޖަހާ ކަހަލަ ގޮތަކަށް،" އޭނާ ބުންޏެވެ.

ސެލަންގޯރު ޗީފް މިނިސްޓަރ އަމީރުއްދީން ޝަރީ ވަނީ ކައިރީގައި ހުރި މިސްކިތެއްގައި ވަގުތީ ހިޔާވަހިކަމެއް ޤާއިމްކޮށްފައިވާ ކަމަށް ބުނެފައެވެ. އަދި ތަޙްޤީޤާއި ސަލާމަތްކުރުމުގެ މަސައްކަތް ކުރިއަށްދާ ވަގުތު އާންމުން އެ ސަރަހައްދާ ދުރުހެލިވުމަށް އިންޒާރުދީފައިވެއެވެ.