މަސްވެރިންނަށް ދޭންޖެހޭ ހުރިހާ ފައިސާއެއް ދީ ޚަލާސްކޮށްފި!

މަސްވެރިންނަށް ސަރުކާރުން ދޭންޖެހޭ ހުރިހާ ފައިސާއެއް ދީ ޚަލާސްކޮށްފި ކަމަށް މިފްކޯއިން ބުނެފިއެވެ. 

މިފްކޯއިން ބުނެފައިވަނީ މަސްވެރިން ކިރުވި މަހަށް ދޭންޖެހިފައިވާ 17.3 މިލިޔަން ރުފިޔާ މިހާރު ދޫކޮށްފައިވާކަމަށެވެ.

 މިފްކޯއިން ބުނީ މިއީ މިދިޔަ މަހުގެ 24 އިން މިމަހުގެ 26 ވަނަ ދުވަހުގެ ނިޔަލަށް މިފްކޯއަށް ކިރާފައިވާ މަހަށް މަސްވެރިންނަށް ދޭން ޖެހިފައިހުރި ފައިސާކަމަށެވެ. މި ސަރުކާރުން ވެރިކަމާ ހަވާލުވިއިރު މަސްވެރިންނަށް ނުދީހުރި ގިނަ ޢަދަދެއްގެ ފައިސާ ސަރުކާރުގެ އެހީއާއެކު މިފްކޯއިން ވަނީ މީގެކުރިން ދައްކާ ޚަލާސްކޮށްފައި ކަން ފާހަގަކޮށްލަން ޖެހެއެވެ.

 ސަރުކާރުން މިހާތަނަށް މަސްވެރިންނަށްވަނީ ބިލިޔަނަކަށްވުރެ ގިނަ ރުފިޔާ ދޫކޮށްފައެވެ. އަދި މަސްވެރިން ކިރުވާ މަހަށް ޤަވާއިދުން ފައިސާ ދެއްކުމަށް އެ ކުންފުނިން އަންނަނީ މަސައްކަތް ކުރައްވަމުންނެވެ. މަސްވެރިންގެ އަތުން ގަންނަ މަހަށް ދޭންޖެހޭ ފައިސާ ޤަވާއިދުން ދެވޭނެ އިންތިޒާމެއް ހަމަޖެއްސުމަށްޓަކައި މިދިޔަ ޖުލައި މަހުން ފެށިގެން މިފްކޯއިން މަސްވެރިންއަތުން މަސް ގަންނަމުންދަނީ ބައިނަލްއަޤްވާމީ ބާޒާރުގައި ގަނޑުކުރި ކަޅުބިލަމަހުގެ އަގު ހުރި މިންވަރަށާއި، މަސް ގަނެ އެކްސްޕޯޓުކުރުމަށް ހިނގާނެ ޚަރަދުތަކަށް ބަލައި ކޮންމެ ހަފްތާއަކު ހަމަޖައްސަވާ އަގެއްގައި ކަމަށް ސަރުކާރުން ހާމަކޮށްފައިވެއެވެ.