ޤައުމީ ސަލާމަތާ ގުޅޭ މަޝްރޫޢުތަކަށް އިންވެސްޓްކުރަންޖެހޭ އަދަދު 100 މިލިއަން ޑޮލަރަށް ބޮޑުކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު  ވަނީ ޤައުމީ ސަލާމަތާ ގުޅޭ މަޝްރޫޢުތަކަށް ކްރޮސް ސަބްސިޑީ އުސޫލުން އިންވެސްޓްކުރަންޖެހޭ އެންމެ ކުޑަ އަދަދު 15 މިލިއަން ޑޮލަރުން 100 މިލިއަން ޑޮލަރަށް އިތުރުކުރައްވާފައެވެ. މި ބަދަލު ގެނެވިފައިވަނީ ދައުލަތުގެ އާންމު މަންފާއަށްޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތުގެ ދަށުން ހިންގާނެ މުހިންމު މަޝްރޫޢުތައް ކަނޑައެޅުމަށް އެކުލަވާލެވުނު ރައީސުލްޖުމްހޫރިއްޔާގެ ޤަރާރަށް ގެނެވުނު އިސްލާހެއްގެ ދަށުންނެވެ.

މިދިޔަ މަހުގެ 21 ވަނަ ދުވަހު ގެޒެޓްކުރެވުނު ރައީސުލްޖުމްހޫރިއްޔާގެ ޤަރާރުގައި ބަޔާންކޮށްފައިވާ ގޮތުން، ރާއްޖޭގެ މިނިވަންކަމާއި ސިޔާދަތު އަދި އިސްތިޤްލާލު ހިމާޔަތްކޮށް ރައްކާތެރިކުރުމަށާއި، ޤައުމުގެ ސުލްޙަމަސަލަސްކަން ދެމެހެއްޓުމަށްޓަކައި ވަކި މަޝްރޫޢުތަކެއް ކުރިއަށް ގެންދިއުމަށް ވަނީ ރޭވިފައެވެ. މި މަޝްރޫޢުތަކަށް ކްރޮސް ސަބްސިޑީ އުސޫލުން އިންވެސްޓްކުރަން ބޭނުންވާ ފަރާތްތަކަށް އެ ފުރުޞަތު ހުޅުވާލެވިފައިވާއިރު، އެންމެ ފުރަތަމަ މި މަޝްރޫޢުތަކަށް މަދުވެގެން 15 މިލިއަން ޑޮލަރު އިންވެސްޓްކުރަންޖެހޭ ކަމަށް ވަނީ ކަނޑައަޅާފައެވެ.

ނަމަވެސް، އެންމެ ފަހުން ގެނެވުނު އިސްލާހާ އެކު، ޤައުމީ ސަލާމަތާ ގުޅުންހުރި މަޝްރޫޢުތަކަށް އިންވެސްޓްކުރަންޖެހޭ އެންމެ ކުޑަ އަދަދު ވަނީ 100 މިލިއަން ޑޮލަރަށް އިތުރުކުރެވިފައެވެ. މި ބަދަލު ގެނެވިފައިވަނީ ރާއްޖޭގެ ޤައުމީ ސަލާމަތާއި ރައްކާތެރިކަމަށް އިތުރު އަހައްމިއްޔަތުކަމެއް ދިނުމުގެ ގޮތުން ކަމަށް ބެލެވެއެވެ.

ރާއްޖޭގެ މިނިވަންކަމާއި ސިޔާދަތު ހިމާޔަތްކުރުމަށާއި ޤައުމުގެ ސުލްޙަމަސަލަސްކަން ދެމެހެއްޓުމަށް ކުރިއަށް ގެންދިއުމަށް ނިންމާފައިވާ މަޝްރޫޢުތަކުގެ ތަފްސީލު މިހާތަނަށް ސަރުކާރުން ހާމަކުރައްވާފައެއް ނުވެއެވެ. އެހެންނަމަވެސް، ރާއްޖޭގެ އަސްކަރީ ޤާބިލުކަން އިތުރުކޮށް، އިޤްތިޞާދީ ސަރަޙައްދު ހިމާޔަތްކޮށް ބެލެހެއްޓުމަށް ސަރުކާރުން ގިނަ މަސައްކަތްތަކެއް ކުރަމުންދާކަން ފާހަގަކުރެވެއެވެ.

ރައީސުލްޖުމްހޫރިއްޔާ، ދިވެހިރާއްޖޭގެ މިނިވަންކަމާއި ސިޔާދަތާއި އިސްތިޤުލާލު ހިމާޔަތްކޮށް ރައްކައުތެރިކުރުމަށާއި، ޤައުމުގެ ސުލްޙަމަސަލަސްކަން ދެމެހެއްޓުމަށްޓަކައި ކުރިޔަށް ގެންދިޔުމަށް ރާވައިފައިވާ މަޝްރޫޢުތަކަށް އެންމެ މަދުވެގެން ޚަރަދުކުރަންޖެހޭނޭ މިންވަރު ސަތޭކަ މިލިއަން… pic.twitter.com/hYuu3fSKxr

— The President's Office (@presidencymv) April 1, 2025