ދުނިޔެ
އިސްރާއީލުގެ ބޮޑުވަޒީރު ނެތަންޔާހޫ ހައްޔަރުކުރޭ : އެމްނެސްޓީ އިންޓަނޭޝަނަލް

އަނިޔާވެރި ނެތަންޔާހޫ އަދި ހަންގޭރީގެ ބޮޑުވަޒީރު ވިކްޓަރ އޯބާން ފޮޓޯ:އިންޓަނެޓް
ހަނގޭރިއަށް ދަތުރުކުރަން ހަމަޖެހިފައިވާ އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ހައްޔަރުކޮށް، އިންޓަނޭޝަނަލް ކްރިމިނަލް ކޯޓަށް (އައިސީސީ) ހަވާލުކުރުމަށް އެމްނެސްޓީ އިންޓަނޭޝަނަލްއިން ގޮވާލައިފިއެވެ.
އެމްނެސްޓީ އިންޓަނޭޝަނަލްގެ ގްލޯބަލް ރިސާރޗް، އެޑްވޮކަސީ އެންޑް ޕޮލިސީގެ ވެރިޔާ އެރިކާ ގުއެވާރާ-ރޯސަސް ވިދާޅުވީ، ނެތަންޔާހޫއަކީ ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ތުހުމަތު ކުރެވޭ މީހެއް ކަމަށެވެ. އޭނާގެ މައްޗަށް ތުހުމަތު ކުރެވެނީ ހަނގުރާމައިގެ ހަތިޔާރެއްގެ ގޮތުގައި ބަނޑުހައިހޫނުކަން ބޭނުންކުރުމާއި، އާންމު ރައްޔިތުންނަށް ގަސްދުގައި ހަމަލާދިނުމާއި، މީހުން މެރުމާއި، އަނިޔާވެރިވުމާއި އެހެނިހެން ލާއިންސާނީ ޢަމަލުތައް ހިންގުމުގެ ކުށެވެ.
އައިސީސީގެ މެންބަރު ޤައުމެއްގެ ހައިސިއްޔަތުން، ނެތަންޔާހޫ ހަނގޭރިއަށް ދަތުރުކޮށްފިނަމަ، އޭނާ ހައްޔަރުކޮށް އައިސީސީއަށް ހަވާލުކުރުމަކީ ހަނގޭރިގެ ޒިންމާއެއް
އެރިކާ ވިދާޅުވިއެވެ.
ހަނގޭރިގެ ބޮޑުވަޒީރު ވިކްޓަރ އޯބާން ނެތަންޔާހޫ ހަނގޭރިއަށް ދަޢުވަތު ދީފައިވާކަމަށް ބުނެވެއެވެ. އެރިކާ ވިދާޅުވީ މިއީ އައިސީސީއާއި އޭގެ މަސައްކަތް ނިކަމެތިކޮށްލުމަށް ކުރާ މަސައްކަތެއް ކަމަށެވެ. އަދި މިއީ އިސްރާއީލުން ޣައްޒާގައި ހިންގާ ޖެނޮސައިޑްގެ ޝިކާރައަކަށްވެފައިވާ ފަލަސްޠީނު ރައްޔިތުންނަށް ކުރާ ފުރައްސާރައެއް ކަމަށްވެސް އޭނާ ވިދާޅުވިއެވެ.
އެމްނެސްޓީ އިންޓަނޭޝަނަލްއިން ގޮވާލަނީ އައިސީސީގެ ޕްރޮސެކިއުޓަރު އިސްރާއީލުގެ ހުރިހާ ކުށްތަކެއް ތަޙުޤީޤުކޮށް، ދަޢުވާ ކުރުމަށެވެ. އަދި ހަނގޭރިއިންވެސް ޔުނިވަރސަލް ޖުރިސްޑިކްޝަންގެ އުސޫލުތައް ބޭނުންކޮށްގެން އެކަން ކުރުމަށެވެ. އައިސީސީއިން ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ތުހުމަތު ކުރާ ނެތަންޔާހޫ ފަދަ ބާރުގަދަ ލީޑަރުން ދެން އަބަދަށް އަދަބުން ސަލާމަތްވެގެން ނުވާނެ ކަމަށްވެސް އެމްނެސްޓީ އިންޓަނޭޝަނަލްއިން ބުނެފައިވެއެވެ.