އެމްޑަބްލިޔުއެސްސީއަށް 30 އަހަރު ފުރުމާއި ގުޅިގެން ގިނަ ހަރަކާތްތަކެއް ކުރިއަށް ގެންދަނީ

މާލެ ވޯޓަރ އެންޑް ސެވަރޭޖް ކޮމްޕެނީ، އެމްޑަބްލިއުއެސްސީއަށް 30 އަހަރު ފުރުމާއި ގުޅިގެން ގިނަ ޙަރަކާތްތަކެއް ކުރިއަށް ގެންދިއުމަށް ނިންމައިފިއެވެ.

މި ޙަރަކާތްތައް ކުރިއަށް ގެންދިޔުމަށް ނިންމާފައިވަނީ، މިއަހަރުގެ ތެރޭގައި އެކި ދުވަސްތަކަށް ބަހައިލައިގެންނެވެ. އެގޮތުން ކުރިއަށް ގެންދާ ޙަރަކާތްތަކުގެ ތެރޭގައި، ކުޑަކުދިންގެ ހަވީރު، ގަސް އިންދުމުގެ ޕްރޮގްރާމް، ލޭ ހަދިޔާކުރުމުގެ ޕްރޮގްރާމް، އަދި އެ ކުންފުނީގެ ޚިދުމަތް ހޯދަމުން އަންނަ ކަސްޓަމަރުންނަށް އަމާޒުކޮށްގެން ކުރިއަށް ގެންދާ ޙަރަކާތްތަކެއް ހިމެނެއެވެ.

މީގެ އިތުރުން، މި ކުންފުނީގެ ފެންވަރު ރަނގަޅުކޮށް، ރައްޔިތުން ބަލައިގަންނަފަދަ ޚިދުމަތެއް ދިނުމަށް ގިނަ މަސައްކަތްތަކެއް ކުރައްވަމުން އަންނަކަމަށް ވެސް އެ ކުންފުނިން މަޢުލޫމާތުދެއެވެ. އެގޮތުން، ކަސްޓަމަރުންނަށް ޚިދުމަތް ދިނުމަށް 24 ގަޑިއިރު ގުޅޭ ކަސްޓަމަރ ކެއަރ ސެންޓަރެއް ޤާއިމްކުރުމަށް އެ ކުންފުނިން ވަނީ ނިންމާފައެވެ. ހަމަ އެހެންމެ، ކަސްޓަމަރުންނަށް ލުއިފަސޭހަ ގޮތެއްގައި ޚިދުމަތް ފޯރުކޮށްދިނުމަށް އެ ކުންފުނީގެ ޚިދުމަތްތަކަށް އެދި އޮންލައިންކޮށް ހުށައެޅޭނެ އިންތިޒާމުތަކެއް ހަމަޖެއްސުމަށް އަންނަނީ މަސައްކަތް ކުރަމުންނެވެ.

އެމްޑަބްލިޔުއެސްސީގެ ހިންގުން އިތުރަށް ހަރުދަނާކުރުމަށް ސްމާޓް މީޓަރ ބޭނުންކުރަން ފެށުމުގެ މަސައްކަތް ވެސް ކުރަމުން ގެންދާކަމަށް އެ ކުންފުނިން ވަނީ ބުނެފައެވެ. ހަމަ އެހެންމެ، އޮންލައިން ޕޯޓަލް އަދި މޯބައިލް އެޕްލިކޭޝަން އަޕްގްރޭޑްކޮށް، އާ ޚިދުމަތްތަކާއެކު ތަޢާރަފްކުރުމުގެ މަސައްކަތް ވެސް ހިމެނޭކަމަށް އެ ކުންފުނިން ވަނީ މަޢުލޫމާތު ދީފައެވެ.

މީގެ އިތުރުން، ހުޅުމާލޭގައި ޤާއިމްކޮށްފައިވާ ކާރުޚާނާ ފުޅީގައި ބަންދުކޮށްފައިވާ ފެން އުފެއްދުމާއި، ކ. ގުޅީފަޅުގައި ގާއިމްކޮށްފައިވާ ޕައިޕް ފެކްޓަރީއިން ފެނާއި ނަރުދަމާގެ މަސައްކަތްތަކާއި ފެން ވައިރިން އަށް ބޭނުންވާ އެކި ސައިޒްތަކުގެ ހޮޅި އުފެއްދުމުގެ މަސައްކަތްތައް ވެސް އެ ކުންފުނިން ގެންދަނީ ކުރަމުންނެވެ. ހަމަ އެހެންމެ، ކަރަންޓު ވަޔަރިންއަށް ބޭނުންވާނެ އެކި ސައިޒްތަކުގެ ކޮންޑިއުޓް ހޮޅި އުފެއްދުމުގެ މަސައްކަތް ވެސް އެމްޑަބްލިޔުއެސްސީން ގެންދަނީ ކުރަމުންނެވެ.

އެމްޑަބްލިޔުއެސްސީއަކީ، ދިވެހިންނަށް ފެނާއި ނަރުދަމާގެ ޚިދުމަތްތައް ފޯރުކޮށްދިނުމަށް މެދުކެނޑުމެއްނެތި މަސައްކަތް ކުރަމުން ގެންދާ ކުންފުންޏެކެވެ. އަދި އެ ކުންފުނީގެ އަމާޒަކީ، ކަސްޓަމަރުންނަށް އެންމެ ލުއިފަސޭހަ ގޮތަށް އެ ކުންފުނީގެ ޚިދުމަތްތައް  ފޯރުކޮށްދިނުންކަމަށް އެމްޑަބްލިޔުއެސްސީން ބުނެއެވެ.