ބައިބަލާ ޗެލެންޖު: އެންމެ ފަހުގެ ޗެމްޕިއަން ބުރު ސްޕޯޓްސް ކުލަބުގެ މައްޗަށް ޓީއެފްޓީން ކުރި ހޯދައިފި

ކޮންމެ އަހަރެއްގެ ވެސް ފިޠުރު  ޢީދާއި ދިމާކޮށް ބާއްވަމުން ގެންދާ "ޢީދު ބައިބަލާ ޗެލެންޖު" ގެ ފުރަތަމަ މެޗުގައި އެންމެ ފަހުގެ ޗެމްޕިއަން ޓީމް ބުރު ސްޕޯޓްސް ކުލަބުގެ މައްޗަށް ޓީއެފްޓީން ކުރި ހޯދައިފިއެވެ.

މިރޭގެ މެޗުގައި ޓީއެފްޓީން ބުރު ސްޕޯޓްސް ކްލަބުގެ މައްޗަށް ކުރި ހޯދާފައިވަނީ ދެ ގޭމުން މޮޅުވެގެންނެވެ. އެގޮތުން މިރޭގެ ފުރަތަމަ ގޭމުގައި ބޭރުން ކުޅެފައިވަނީ ޓީއެފްޓީންނެވެ. އަދި އެތެރެއިން ކުޅުނީ ބުރު ސްޕޯޓްސް ކްލަބުންނެވެ.

މިރޭގެ މެޗުގެ ފުުރަތަމަ ގޭމުގައި ފެނިގެންދިޔައީ، ބުރު ސްޕޯޓްސް ކުލަބުން އެތެރޭގައި ރާވާލައިގެން ކުޅެން މަސައްކަތް ކުރަމުންދިޔަ މަންޒަރެވެ. ނަމަވެސް، ޓީއެފްޓީން ވަނީ މި ގޭމު ނިމެން ކުޑަތަންވެފައި ވަނިކޮށް ބުރު ސްޕޯޓްސް ކުލަބުގެ ކުޅުންތެރިން ގޭމުން ނުބައިކޮށް މޮޅު ހޯދާފައެވެ. އެގޮތުން، މި ގޭމު ޓީއެފްޓީން ކާމިޔާބުކޮށްފައިވަނީ 6-7 ގެ ނަތީޖާއަކުންނެވެ.

މި މެޗުގެ ދެވަނަ ގޭމު ފެށިގެންދިޔައީ ދެ ޓީމުގެ ވެސް ވަރަށް ވާދަވެރިކަމާއެކުގައެވެ. އެގޮތުން މެޗުގެ ދެވަނަ ގޭމުގައި ޓީއެފްޓީން އެތެރެއިން ކުޅެމުންދިޔައިރު، ބުރު ސްޕޯޓްސް ކުލަބުން ކުޅެފައިވަނީ ބޭރުންނެވެ. މި ގޭމުގައި ބުރު ސްޕޯޓްސް ކުލަބުން ވަނީ ޓީއެފްޓީގެ ކުޅުންތެރިން ނުބައިކުރެވޭތޯ ވަރަށް މަސައްކަތް ކުރަމުންނެވެ. ނަމަވެސް ޓީއެފްޓީން ވަނީ، 4-15 ގެ ނަތީޖާއަކުން ކުރިހޯދައި މިރޭގެ މެޗު ކާމިޔާބުކޮށްފައެވެ.

ޢީދު ބައިބަލާ ޗެލެންޖަކީ ރާއްޖޭގެ ޒުވާނުންގެ މެދުގައި ވަރަށް ފޯރިގަދަ އަދި އެހާމެ މަޤުބޫލު މުބާރާތެކެވެ.  ބައިބަލާ އެސޯސިއޭޝަނުން މަޢުލޫމާތުދޭ ގޮތުގައި މިއަހަރުގެ މުބާރާތުގައި ޖުމްލަ 29 ޓީމަކުން ވާދަކުރާނެއެވެ.