ސައިންސް / ދުނިޔެ / ވިޔަފާރި
ޗައިނާ އިން "އުދުހޭ ޓެކްސީ" ޚިދުމަތް ފަށައިފި: ދުނިޔޭގެ ފުރަތަމަ ވިޔަފާރި އުސޫލުން ހިންގާ އޮޓޮނޮމަސް ޕެސެންޖަރ ޑްރޯން

އޮޓޮނޮމަސް ޕެސެންޖަރ ޑްރޯން ފޮޓޯ:އިންޓަނެޓް
ޗައިނާގެ ސިވިލް އޭވިއޭޝަން އޮތޯރިޓީ (ސީއޭއޭސީ) އިން ފުރަތަމަ ފަހަރަށް އޮޓޮނޮމަސް ޕެސެންޖަރ ޑްރޯން ނުވަތަ "އުދުހޭ ޓެކްސީ" ވިޔަފާރި އުސޫލުން ހިންގުމުގެ ހުއްދަ ދީފިއެވެ. މި ހުއްދަ ދީފައިވަނީ ނެސްޑެކްގައި ލިސްޓުކޮށްފައިވާ އީހަންގ ހޯލްޑިންގްސް އަދި ހެފެއި ހޭ އެއަރލައިންސް އަށެވެ. މި ހުއްދައާއެކު މި ދެ ކުންފުންޏަށް ޕައިލެޓެއް ނެތި އުދުހޭ ޑްރޯން މެދުވެރިކޮށް މީހުން އުފުލުމުގެ ޚިދުމަތް ދެވޭނެއެވެ. މީގެ ތެރޭގައި ރަށުތެރެ ބެލުމަށް ކުރާ ދަތުރުތައްވެސް ހިމެނެއެވެ.
ޗައިނާގެ ސަރުކާރުން ވަނީ މަތިންދާބޯޓު އަދި ޑްރޯން ފަދަ އުޅަނދުތައް ބޭނުންކޮށްގެން ތިރި އުސްމިނުގައި ކުރެވޭ އިޤްތިޞާދީ ޙަރަކާތްތަކަށް އިސްކަންދޭން ފަށާފައެވެ. މިއީ ބަޔޯމެނުފެކްޗަރިންގ، ކުއަންޓަމް ކޮމްޕިއުޓިންގ، އާޓިފިޝަލް އިންޓެލިޖެންސް އަދި 6ޖީ ނެޓްވޯކްތަކާއެކު އިޤްތިޞާދީ ކުރިއެރުމަށް މަގުފަހިކުރާނެ ކަމެއްކަމަށް ސަރުކާރުން ދެކެއެވެ.
އީހަންގ ކުންފުނިން ތައްޔާރުކޮށްފައިވާ އީއެޗް216-އެސް އަކީ ދެ މީހުން އުފުލޭ، 16 ޕްރޮޕެލަރު ހަރުކޮށްފައިވާ، ކާބަން ފައިބަރުން އުފައްދާފައިވާ އުޅަނދެކެވެ. މި އުޅަނދަށް ގަޑިއަކު 100 ކިލޯމީޓަރުގެ ސްޕީޑުގައި ދަތުރުކުރެވޭނެއެވެ. އަދި 3،000 މީޓަރުގެ އުސްމިނަށް އުދުހޭނެއެވެ. މި އުޅަނދު ދުއްވުމަށް ޕައިލެޓަކު ބޭނުމެއް ނުވެއެވެ.
ޗައިނާގެ ތިރި އުސްމިނުގެ އިޤްތިޞާދު 2025 ވަނަ އަހަރާ ހަމައަށް 1.5 ޓްރިލިއަން ޔުއާންއަށް އަދި 2035 ވަނަ އަހަރާ ހަމައަށް 2.5 ޓްރިލިއަން ޔުއާންއަށް އިތުރުވާނެ ކަމަށް ރިސާރޗް ގްރޫޕުން ލަފާކުރެއެވެ. މި ދާއިރާގައި ޗައިނާގެ ކުންފުނިތަކުގެ އިތުރުން ބޯއިންގ، އެއާބަސް އަދި އެމްބްރޭއާ ފަދަ ބޮޑެތި ބައިނަލްއަޤްވާމީ ކުންފުނިތަކުންވެސް ވާދަކުރަމުންދާކަން ފާހަގަކުރެވެއެވެ.