އެއްހަނގުރާމައެއްގައި މިހާތަނަށް އެންމެ ގިނަ މީޑީއާ ވޯކަރުން ޝަހީދުވެފައިވަނީ ޣައްޒާ ހަނގުރާމައިގައި

އެއް ހަނގުރާމައެއްގައި މިހާތަނަށް އެންމެ ގިނަ މީޑިއާ ވޯކަރުން ޝަހީދުވެފައިވަނީ ޣައްޒާގައި ހަނގުރާމައިގައިކަމަށް ދަ ކޮސްޓްސް އޮފް ވާރ ޕްރޮޖެކްޓުން ޝާއިއުކުރި އާ ކަރުދާހެއްގައި ބުނެފިއެވެ.

އެކަރުދާހުގައި ބުނެފައިވަނީ 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ޣައްޒާގައި ޝަހީދުވި ނޫސްވެރިންގެ އަދަދު ދުނިޔޭގެ ހަނގުރާމަތަކާއި އެހެން ބޮޑެތި ހަނގުރާމަތަކުގައި މަރުވި ނޫސްވެރިންގެ އަދަދަށް ވުރެ އިތުރުވެފައިވާ ކަމަށެވެ.

މީގެ ތެރޭގައި އެމެރިކާގެ ދާޚިލީ ހަނގުރާމައާއި، ފުރަތަމަ އަދި ދެވަނަ ބޮޑު ހަނގުރާމައާއި، ކޮރެއާ ހަނގުރާމައާއި، ވިއެޓްނާމް ހަނގުރާމައާއި، ކެމްބޯޑިއާ އާއި ލާއޯސްގައި ހިނގި ހަމަނުޖެހުންތަކާއި، 1990 އާއި 2000 ގެ އަހަރުތަކުގައި ޔޫގޮސްލާވިއާގައި ހިނގި ހަނގުރާމަތަކާއި، 9/11 ގެ ފަހުން އަފްޣާނިސްތާނުގައި ހިނގި ހަނގުރާމަ ހިމެނެއެވެ.

"ސާފުކޮށް ބުނާނަމަ މިއީ ރިޕޯޓަރުންނަށް މިހާތަނަށް ދިމާވި އެންމެ ނުރައްކާތެރި ހަނގުރާމަ” ކޮސްޓްސް އޮފް ވާރ ޕްރޮޖެކްޓުން ބުނެފައިވެ އެވެ.

ފަލަސްޠީނުގެ ސަރުކާރުގެ މީޑިއާ އޮފީހުން އަންގާރަ ދުވަހު ބުނެފައިވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރާއީލުން ޣައްޒާއާ ދެކޮޅަށް ކުރި ހަނގުރާމައިގައި މިހާރު 209 ނޫސްވެރިން ޝަހީދުވެފައިވާކަމަށެވެ.

ޝަހީދުވަމުންދާ މީހުންގެ ޢަދަދުތައް މައްޗަށް ދަމުންދާއިރު އިޒްރާއިލުން ޣައްޒާއަށް ދެމުންދާ ހަމަލާތައް ހުއްޓުމަކަށް ނާދެއެވެ. އަދި ކުރިއަށްވުރެ ބޮޑަށް މިހާރުގެ ހަމަލާތައް ވަނީ ވަރުގަދަކޮށްފައެވެ.