ފައިސާއަށް ޚިޔާނާތްތެރިވި ބީއެމްއެލްގެ މުވައްޒަފެއްގެ މައްޗަށް މުޖްތަމަޢުއަށް ޚިދުމަތްކުރުމުގެ ޙުކުމެއް އިއްވައިފި!

ކަސްޓަމަރުންގެ ފައިސާއަށް ޚިޔާނަތްތެރިވި ބޭންކް އޮފް މޯލްޑިވްސްގެ މުވަޒަފެއްގެ މައްޗަށް މުޖްތަމަޢަށް ޚިދުމަތް ކުރުމުގެ ޙުކުމެއް ކްރިމިނަލް ކޯޓުން އިއްވައިފިއެވެ.

ކަސްޓަމަރުންގެ 4 ލައްކަ އަށްވުރެ ގިނަ ރުފިޔާއަށް ޚިޔާނަތްތެރިވި މައްސަލާގައި ކްރިމިނަލް ކޯޓުން ޙުކުމް ކޮށްފައިވަނީ ބ.އޭދަފުށި/ހިޔާވަހި، އަލީ މާޒިންގެ މައްޗަށެވެ.

މިގޮތުން ކްރިމިނަލް ކޯޓުން ކޮށްފައިވާ ޙުކުމްގައި ބުނެފައިވަނީ، 18 ސެޕްޓެމްބަރު 2012 އިން ފެށިގެން 26 އޮކްޓޫބަރު 2021 އާއި ހަމައަށް މާޒިން ބީއެމްއެލްގެ ކަސްޓަމަރ ސަރވިސް އެސިސްޓެންޓެއްގެ ގޮތުގައި މަސައްކަތް ކުރިއިރު، މަޤާމުން އޭނާއަށް ލިބިފައިވާ މަޢުލޫމާތާއި ބާރުގެ ބޭނުންކޮށްގެން 13 ކަސްޓަމަރެއްގެ މައުލޫމާތު ބީއެމްއެލްގެ ސީއާރްއެމް ސިސްޓަމްއިން ބަދަލުކޮށް، ކަސްޓަމަރުންގެ ހުއްދަ ނެތި އެ ކަސްޓަމަރުންގެ އިންޓަނެޓް ބޭންކިން ރަޖިސްޓްރީ ކޮށްފައިވާ ކަމަށެވެ.

އެގޮތުން އޭނާ ވަނީ މި ކަސްޓަމަރުންގެ އެކައުންޓުން ޖުމްލަ 482،611 ރުފިޔާ ޞައްޙަ ނޫން ކްރެޑިޓް ކާޑު ޕޭމަންޓުގެ ގޮތުގައާއި، ފޮރެކްސް ޓްރާންސެކްޝަނުގެ ގޮތުގައާއި، މާޒިންގެ އަމިއްލަ އެކައުންޓަށް ޖަމާކޮށް، އަމިއްލަ ފައިސާގެ ގޮތުގައި އެ ފައިސާއިން މުޢާމަލާތްކޮށް އެފައިސާއަށް ޚިޔާނާތްތެރިވެފައި ކަމަށްވެސް ބުނެފައިވެއެވެ.

އެ މައްސަލާގައި މާޒިން ކުށަށް އިޢްތިރާފް ވުމުގެ އިތުރުން، ޕްރޮސެކިއުޓާ ޖެނެރަލް (ޕީޖީ) އޮފީހާއިއެކު، އިޢްތިރާފު އެއްބަސްވުމެއް ހަދާފައިވާއިރު، މި އެއްބަސްވުމުގެ ދަށުން އޭނާގެ މައްޗަށް އޮތް އަސްލު އަދަބު ކަމުގައިވާ 9 މަހާއ 18 ދުވަހުގެ ޖަލު ހުކުމް 40 ގަޑިއިރު މުޖުތަމަޢަށް ޚިދުމަތްކުރުމަށާއި، 56،200 ރުފިޔާގެ ޖޫރިމަނާއަކަށް ބަދަލުކުރުމަށްވަނީ ކަނޑައަޅާފަ އެވެ.

ހަމައެއާއިއެކު، ބީއެމްއެލްއާއި މާޒިންގެ މެދުގައި ހަދާފައިވާ އެއްބަސްވުމާ އެއްގޮތަށް ބޭންކަށް ފައިސާ ދެއްކުމަށް ވެސް މި އެއްބަސްވުމުގައި ބަޔާން ކުރެއެވެ.

އެހެންކަމުން، ކްރިމިނަލް ކޯޓުން ވަނީ މާޒިން 40 ގަޑިއިރު މުޖުތަމައަށް ޚިދުމަތްކުރުމަށާއި، 56،200 ރުފިޔާގެ ޖޫރިމަނާ ކުރުމަށް ޙުކުމްކޮށް، ޖޫރިމަނާގެ ފައިސާ ތިން މަސްދުވަހުގެ ތެރޭގައި މީރާ އަށް ދެއްކުމަށް ޙުކުމްކޮށްފައިއެވެ.