ދުންފަތުގެ ވިޔަފާރިކުރާ ފަރާތްތަކުން އެހެން ވިޔަފާރިއަކަށް ބަދަލުވުމަށް ރައީސް އިލްތިމާސްކުރައްވައިފި

ރާއްޖޭގައި ދުންފަތުގެ ވިޔަފާރިކުރާ ފަރާތްތަކުން އެ ވިޔަފާރި ދޫކޮށްލައި، އެހެން ވިޔަފާރިއަކަށް ބަދަލުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްްތިމާސްކުރައްވައިފިއެވެ.

އެމަނިކުފާނު މިކަމަށް އިލްތިމާސްކުރައްވާފައިވަނީ، "ރައްޔިތުންނާ އެކު" މި ނަމުގައި ރައީސުލްޖުމްހުރިއްޔާގެ އޮފީހުން ކުރިއަށްގެންދާ ސިލްސިލާ  ޕޮޑްކާސްޓްގެ 2 ވަނަ އެޕިސޯޑުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއަށް ސިނގިރޭޓު އެތެރެކޮށް އޭގެ ވިޔަފާރި ކުރާ ފަރާތްތަކުން އެ ވިޔަފާރި ދޫކޮށްލާ ވިޔަފާރި ކުރުމަށް އެހެން ގޮތެއް ޚިޔާރުކުރަން ޖެހޭ ކަމަށެވެ. ހަމަ އެހެންމެ، އެމަނިކުފާނު ވަނީ ސިނގިރޭޓު ބުއިމާއި ދުންފަތުގެ އިސްތިއުމާލު ކުރުމުން އެންމެހާ ފަރާތްތަކުން ދުރުވުމަށް ބާރުއަޅުއްވާފައެވެ. އަދި ދުންފަތުގެ ވިޔަފާރީގައި ބޭނުންކުރާ ބާވަތްތަކުގެ އަގުބޮޑުކުރުމުގެ އެންމެ ބޮޑު އެއް މަޤްޞަދަކީ، ރައްޔިތުން އެކަމުން ސަލާމަތްކުރުން ކަމަށް ރައީސް ވަނީ ވިދާޅުވެފައެވެ. އެހެންކަމުން، މިކަމަކީ އެކިފަހަރު މަތިން ޓެކްސް ބޮޑޫކޮށްގެން ވާނެ ކަމެއް ނޫންކަމަށް އެމަނިކުފާނު ވަނީ ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދުންފަތުގެ ވިޔަފާރިތަކަކީ ދިވެހިރާއްޖެފަދަ ކުޑަ ޤައުމެއްގައި ކޮށްގެންވާނެކަމެއް ނޫންކަމަށެވެ. އަދި މިކަމުން ދިވެހިރާއްޖެ ސަލާމަތްކުރެއްވުމަށް ރައީސް ވަނީ ގޮވާލައްވާފައެވެ.