ޚަބަރު
ތެލަސީމިއާދުވަހަށް، ތެލަސީމިއާ ސެންޓަރު ހުޅުމާލެއަށް ބަދަލުކުރަނީ

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު
8 މެއި ގައި ފާހަގަކުރާ ބައިނަލްއަޤުވާމީ ތެލަސީމިއާ ދުވަހަށް ހުޅުމާލޭ އޮރެންޖް ހިޔާއަށް ތެލަސީމިއާ ސެންޓަރު ބަދަލުކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
"ރައްޔިތުންނާއިއެކު" ޕޮޑްކާސްޓްގައި ވާހަކަދައްކަވަމުން ރައީސް ވިދާޅުވީ އޮރެންޖު ހިޔާގެ މަސައްކަތް މި މަހުގެ 30 ވަނަ ދުވަހުގެ ކުރިން ނިންމުމަށް ސިފައިންނަށް ދަންނަވާފައިވާނެކަމަށެވެ. އެހެންކަމުން މެއި މަހުގެ 8 ވަނަ ދުވަހަކީ ތެލަސީމިއާ ދުވަސް ކަމަށާއި އެދުވަހަށް މާލޭގައި ހުރި މަރުކަޒު ހުޅުމާލެއަށް ބަދަލުކޮށް ނިމޭނެކަމަށް ރައީސް ވިދާޅުވެފައިވެއެވެ.
ރައީސް ވިދާޅުވީ އޮރެންޖް ހިޔާގައި ގާއިމުކުރާ ތެލެސީމިއާ ސެންޓަރުގެ މާހައުލު ވަރަށް ހިތްގައިމުވާނެކަމަށެވެ. އެގޮތުން މަސައްކަތްތައް ނިންމުމުން، ތެލެސީމިއާ ސެންޓަރުގެ ހިދުމަތްތައް ބަދަލުކުރުމުގެ މަސައްކަތް ވެސް ކުރު މުއްދަތެއްގެ ތެރޭގައި ކުރެވިގެންދާނެ ކަމަށްވެސް ރައީސް ވަނީ ވިދާޅުވެފައެވެ.
ރައީސް ވިދާޅުވީ ހުޅުމާލެއަށް ތެލަސީމިއާ ސެންޓަރު ބަދަލުވާއިރު އިތުރު ވަސީލަތްތައްވެސް ހަމަޖެހިގެންދާނެ ކަމަށެވެ. އެގޮތުން ޑީއެންއޭ ޓެސްޓް ހެދުމަށް ބޭނުންކުރާ މެޝިންތަކާއި އިތުރު ފްރިޖްތައް ހޯދުމުގެ މަސައްކަތްތައް މިހާރު ކުރެވުމުންދާކަމަށެވެ. އަދި ފުލްޓައިމްގައި މަސައްކަތް ކުރާ ސީނިއާ ފިޒިޝަނެއް ވެސް މިހާރު މަސައްކަތް ކުރަން ފަށާފައިވާކަން ރައީސް ފާހަގަ ކުރެއްވިއެވެ.
ތެލަސީމިއާ ކުދިންނާއި އެކުދިންގެ ބެލެނިވެރިންގެ ހުރި ކަންބޮޑުވުންތަކާއި ގުޅިގެން ރައީސުލްޖުމްހޫރިއްޔާ ވަނީ މިދިޔަ މަހު އޮރެންޖް ހިޔާގެ މަސައްކަތްތައް ކުރިއަށްދާގޮތް ބައްލަވާލައްވާފައެވެ. އަދި މަސައްކަތް ހަވާލުކޮށްފައިވާ ފަރާތުގެ ކޮންޓްރެކްޓް ހަމަވާތީ ރައީސް އެ މަސައްކަތް ވަނީ ޤައުމީ ދިފާއީ ބާރާއި ހަވާލުކުރައްވާފައެވެ. މި މަސައްކަތް ނިންމުމަށް ސިފައިންނަށް ދީފައިވާ މުއްދަތަކީ 1 މަސްދުވަހެވެ.