ދުނިޔެ
އިޒްރާއިލްގެ ހަމަލާތަކުގައި މިއަދު ޝަހީދުވި މީހުންގެ ޢަދަދު 42 އަކަށް އަރައިފި
ޝަހީދެއްގެ ހަށިގަނޑު އާއިލާގެ މެމްބަރުންގެ އަތްމަތީން އުފުލަނީ.
އިޒްރާއިލުން ޣައްޒާގެ އެކި ސަރަހައްދުތަކަށް މިހާތަނަށް 42 މީހަކު ޝަހީދުވެފައިވާ ކަމަށް އަލްޖަޒީރާގައި ރިޕޯޓުކޮށްފިއެވެ.
މެޑިކަލް މަސްދަރުތަަކަށް ހަވާލާދީ އަލްޖަޒީރާގައި ބުނެފައިވަނީ އިޒްރާއީލުން ހުއްޓުމެއްނެތި ދެމުންދާ ވައިގެ ހަމަލާތަކުގައި ފަތިހުން ފެށިގެން ޣައްޒާގައި މަދުވެގެން 42 މީހުން ޝަހީދުވެފައިވާ ކަމަށެވެ.
ފަލަސްޠީނު ޞިއްޙީ ވުޒާރާއިން ބުނެފައިވަނީ ޝަހީދުންގެ ތެރޭގައި ނުވަ ކުއްޖަކު ހިމެނޭ ކަމަށެވެ.
މިއަދު އިޒްރާއިލުން ދިން ހަމަލާތައް އަމާޒުކުރި އެއްތަނަކީ ޣައްޒާގެ އުތުރުގައި އޮންނަ ޖަބަލިއާ ރެފިއުޖީ ކޭމްޕްގައި ހުންނަ ޔޫއެންއާރުޑަބްލިއުއޭގެ ކްލިނިކެވެ.
އެކްލިނިކަށް ދިން މިހަމަލާގައި 19 މީހުން ޝަހީދުވެ އެތައް ބަޔަކު ވަނީ ޒަޚަމްވެފައެވެ.
މީގެއިތުރުން ރަފާހްގެ އުތުރުން އޮންނަ ޚިރްބެތު އަލްއަދާސް އާއި މުސްބާހު ސަރަހައްދުގައި އިޒްރާއިލުން ދިން ޑްރޯން ހަމަލާއެއްގައި ފަލަސްތީނުގެ ދެ މީހަކު ޝަހީދުވެފައިވެއެވެ.
ރަފާޙް އަދި ޣައްޒާގެ ޚާން ޔޫނިސްގެ ބައެއް ހިސާބުތަކަށް އިޒްރާއީލުން ދަނީ ވަރުގަދަ ހަމަލާތަކެއް ދެމުންނެވެ.
ހަމަލާތައް ހުއްޓާލުމުގެ އެއްބަސްވުންތަކާއި ޚިލާފުވެ ހަމަލާތައް މާރޗް 18ގައި ފެށިފަހުން މިހާތަނަށް 1،042 މީހުން ވަނީ ޝަހީދުކޮށްލައިފައެވެ.
