ކުޅިވަރު / ޚަބަރު
ލިވަޕޫލް ސަޕޯޓަރެއްގެ ހައިސިއްޔަތުން ރައީސް މައުމޫން ރައީސުލްޖުމްހޫރިއްޔާއަށް ޝުކުރު ދަންނަވައިފި
ލިވަޕޫލްގެ ލެޖެންޑު، ޑެނިއެލް އެގާރއާއެކު 2020 ވަނަ އަހަރު ރާއްޖޭގެ ލިވަޕޫލް ސަޕޯޓަރުން ބެއްވި ރަސްމިއްޔާތެއްގައި ރައީސް މައުމޫނު ވަނީ ބައިވެރިވެވަޑައިގެންފައި ---
ލިވަޕޫލްއާއެކު ރާއްޖޭގެ ޓުއަރިޒަމް ޕްރޮމޯޓު ކުރުމުގެ ކެމްޕެއިން ފެއްޓެވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިނގިރޭސިވިލާތުގެ ލިވަޕޫލަށް ވަޑައިގެންނެވީތީ، ލިވަޕޫލް ފުޓުބޯޅަ ކްލަބުގެ ޒަމާންވީ ސަޕޯޓަރެއްގެ ހައިސިއްޔަތުން އެކަމާ އުފާފުޅު ކުރައްވާކަމަށް ރައީސް މަޢުމޫން އަބްދުލްޤައްޔޫމް ވިދާޅުވެއްޖެއެވެ.
ރައީސް މަޢުމޫން ވިދާޅުވީ، މިފަދަ ހަރަކާތެއްގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ ވަޑައިގެންނެވުމަކީ އެ މަނިކުފާނު ވަރަށް އުފާކުރައްވާ ކަމެއްކަމުގައެވެ.
Being a staunch supporter of Liverpool since the 1970s, I am deeply moved by the fact that President @MMuizzu will be launching the joint Liverpool- Visit Maldives campaign at Anfield @LFC tonight. Thank you Mr President!
— Maumoon Abdul Gayoom (@maumoonagayoom) April 2, 2025
ރައީސް މަޢުމޫނަކީ 1970ގެ އަހަރުތަކުން ފެށިގެން ލިވަޕޫލް ފުޓުބޯޅަ ކްލަބަށް ސަޕޯޓުކުރައްވަމުން ގެންދަވާ ބޭފުޅެކެވެ. އެ މަނިކުފާނު ވަނީ މީގެ ކުރިން ރާއްޖޭގައި އޮތް ލިވަޕޫލް ސަޕޯޓަރުންގެ ކޮމިއުނިޓީގެ ބައެއް ހަރަކާތްތަކުގައި ވެސް ބައިވެރިވެވަޑައިގެންފައެވެ.
ލިވަޕޫލްގެ ލެޖެންޑު، ޑެނިއެލް އެގާރއާއެކު 2020 ވަނަ އަހަރު ރާއްޖޭގެ ލިވަޕޫލް ސަޕޯޓަރުން ބޭއްވި ރަސްމިއްޔާތެއްގައި ރައީސް މައުމޫނު ވަނީ ބައިވެރިވެވަޑައިގެންފައި ---
މިރޭ ރާއްޖެ ގަޑިން 12 ޖަހާއިރު ލިވަޕޫލްގެ އެންފީލްޑުގައި އެވަޓަންއާ ދެކޮޅަށް ކުޅޭ މެޗުގައި، ލިވަޕޫލްގެ ފަތުރުވެރިކަމުގެ މަންޒިލަކަށް ރާއްޖެ ހަމަޖެއްސިކަން ރަސްމީކޮށް އިއުލާންކުރުމަށް ވަނީ ހަމަޖެހިފައެވެ. މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއިން ކުރިން ހާމަކޮށްފައިވާ ގޮތުގައި، މިރޭގެ މެޗުގައި އެންފީލްޑް ސްޓޭޑިއަމްގެ ލެޑް ބޯޑުތަކުގައި "ވިޒިޓް މޯލްޑިވްސް" އާއި ލިވަޕޫލްގެ ޕާޓްނާޝިޕްއާ ގުޅިގެން ރާއްޖޭގެ މަންޒަރުތައް ދައްކާލާނެއެވެ.
އެމްއެމްޕީއާރުސީއިން އިތުރަށް ބުނީ، ޕްރިމިއަރ ލީގުގައި ލިވަޕޫލުން އެންފީލްޑްގައި ކުޅޭ މެޗުތަކުގައި ވިޒިޓް މޯލްޑިވްސް އިޝްތިހާރުކުރާނެކަމަށެވެ. އަދި ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ޓޫރިޒަމް ބްރޭންޑިން ޖަހައި، އެ ކްލަބުގެ ރަސްމީ ޕަބްލިކޭޝަންތަކުގައި ވެސް ރާއްޖެ ޕްރޮމޯޓު ކުރާނެކަމަށެވެ.
