ޖަޕާނުގެ ކިޔުޝޫ ސަރަޙައްދަށް ބާރުގަދަ ބިންހެލުމެއް އަތުވެއްޖެ

ޖަޕާނުގެ ކިޔުޝޫ ސަރަޙައްދަށް ބާރުގަދަ ބިންހެލުމެއް އަތުވެއްޖެއެވެ.

ބިންހެލުންތައް ދިރާސާ ކުރަމުން އަންނަ އިންޑިއާގެ ނޭޝަނަލް ސެންޓަރ ފޯ ސިސްމޮލޮޖީ، އެންސީއެސް އިން މަޢުލޫމާތުދޭ ގޮތުގައި ޖަޕާނުގެ ކިޔުޝޫ އަށް އައިސްފައިވާ މި ބިންހެލުމަކީ 6.0 މެގްނެޓިއުޑް ބާރުމިނުގައި 30 ކިލޯ މީޓަރު އަޑިން އައިސްފައިވާ ބިންހެލުމެކެވެ. އަދި މި ބިންހެލުން އައިސްފައިވަނީ މިރޭގެ 19:34 ހާއިރު ކަމަށް "ޓައިމްސް ނައު" ނޫހުން ވަނީ ރިޕޯޓުކޮށްފައެވެ.

މި ބިންހެލުމާއި ގުޅިގެން އެ ސަރަޙައްދަށް ލިބިފައިވާ އެއްވެސް ގެއްލުމެއްގެ މަޢުލޫމާތެއް އަދި ރިޕޯޓުކޮށްފައެއް ނުވެއެވެ. އަދި މި ބިންހެލުމާއި ގުޅޭ އިިތުރު ތަފްޞީލެއް ވެސް ޖަޕާނުން އަދި ޢާންމުކޮށްފައެއް ނުވެއެވެ.

ޖަޕާނުގެ ޕެސިފިކް އައްސޭރީގައި އޮންނަ ނަންކައި ޓްރޮފަށް ގާތްގަނޑަކަށް 9 މެގްނިޓިއުޑްގެ ބިންހެލުމެއް އައިސްދާނެކަމަށް މި ހަފްތާގައި އެޤައުމުގެ ތަޖުރިބާކާރުންގެ ޕެނަލަކުން އެކުލަވާލި ރިޕޯޓެއްގައި ވަނީ ހާމަކޮށްފައެވެ. އަދި މި ބިންހެލުމުގެ ސަބަބުން ސުނާމީއެއް އައިސް، އިމާރާތްތަކަށް ލިބޭ ގެއްލުންތަކުގެ ސަބަބުން 3 ލައްކައަށް ވުރެ ގިނަ މީހުން މަރުވެދާނެކަމަށް މި ރިޕޯޓުގައި ވަނީ ލަފާކޮށްފައެވެ.