ރާއްޖެއަށް ޓެރަރިސްޓު ހަމަލާއެއް ދީފާނެ ކަމުގެ އިންޒާރު އިނގިރޭސިވިލާތުން ދީފި

ދިވެހިރާއްޖޭއަށް ޓެރަރިސްޓް ހަމަލާއެއް ދީފާނެކަމުގެ އިންޒާރު އިނގިރޭސިވިލާތުން ދީފިއެވެ.

މި އިންޒާރު ދީފައިވަނީ އިނގިރޭސިވިލާތުގެ ޚާރިޖީ ވުޒާރާއިން ނެރުއްވެވި ޓްރެވަލް އިންޒާރެއްގައެވެ. އެގޮތުން، މި ޓްރެވަލް އިންޒާރުގައި ރާއްޖެއަށް ޓެރަރިސްޓު ހަމަލާއެއްގެ ނުރައްކާ އޮތްކަމަށް ވަނީ ހާމަކޮށްފައެވެ. އަދި މިފަދަ ހަމަލާއެއް އައުމުން އެކަމުން ސަލާމަތް ނުވެވޭނެކަމަށާއި ހަމަލާއެއް ނުހުއްޓުވޭނެކަމަށް ވެސް މި އިންޒާރުގައި ވަނީ ބުނެފައެވެ.

މީގެ އިތުރުން، މިފަދަ ޙަމަލާތަކަކީ އެކި ޤައުމުތަކުގެ ފަތުރުވެރިން ރާއްޖެއަށް ޒިޔާރަތްކޮށް ގޮސްއުޅޭ ތަންތަން ހިމެނޭ ގޮތަށް ދެވިދާނެ ހަމަލާއެއްކަމަށް މި އިންޒާރުގައި ބުނެފައިވެއެވެ. އެހެންކަމުން، އެފަދަ ތަންތަނަށް ޒިޔާރަތްކުރާ ފަތުރުވެރިން އެކަމާއި މެދު ހޭލުންތެރިވެ، ކަމާ ބެހޭ ފަރާތްތަކުގެ  އިިރުޝާދާއި އެއްގޮތަށް ޢަމަލުކުރުމަށް މި ޓްރެވަލް އިންޒާރުގައި ވަނީ ބުނެފައެވެ.

އިނގިރޭސިވިލާތުގެ ޚާރިޖީ ވުޒާރާއިން ބުނީީ، އިސްރާޢީލުން ފަލަސްޠީނުގެ ބިމުގައި ހިންގަމުންދާ ޤަތުލު ޢާންމުގެ ސަބަބުން ދުނިޔޭގެ އެކި ކަންކޮޅުތަކުގައި ކަންބޮޑުވުން އޮތް ކަމަށެވެ. އަދި އަލްޤައިދާ އާއި ދާއިޝް ފަދަ ނިރުބަވެރި ޖަމާޢަތްތަކުން ވަނީ ރައްދުގެ ގޮތުގައި ޓެރަރިސްޓު ޙަމަލާތައް ދިނުމަށް އެ ޖަމާޢަތްތަކަށް ތާޢިދު ކުރާ ފަރާތްތަކަށް ގޮވާލާފައިކަމަށް އެ ޤައުމުން ވަނީ ފާހަގަކޮށްފައެވެ.

މި ހަމަނުޖެހުމާއި ނުތަނަވަސްކަމުގެ ސަބަބުން ރާއްޖެއަށް ވެސް އެފަދަ ޙަމަލާއެއް ދިނުމަކީ އެކަން ކުރާ ފަރާތްތަކަށް ހިތްވަރު ލިބިގެންދާނެ ކަމެއްގެ ގޮތުގައި މި ޓްރެވަލް އިންޒާރުގައި ބުނެފައިވެއެވެ.