ހޮޅުދޫ ބޯޓުގައި ދަތުރުކުރި 17 މީހުން ސަލާމަތުގެ އައްސޭރިއަށް، އެކަކު އަދި ނުފެނޭ: އެމްއެންޑީއެފް

މުދާ އުފުލާ ބޯޓެއްކަމަށްވާ "ހޮޅުދޫ ބޯޓު" ގައި ހިނގި އަލިފާނުގެ ހާދިސާގައި ދަތުރުކުރި 17 މީހުން ސަލާމަތްކޮށް، އެކަކު ގެއްލިގެން ހޯދަމުން އަންނަކަމަށް އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، މި ބޯޓުގައި ދަތުރުކުރަމުން ދިޔައީ ކެޕްޓަނާއެކު ޖުމްލަ 18 މީހުން ކަމަށެވެ. އަދި އޭގެ ތެރެއިން އެކަކު ފިޔަވާ އެހެން އެންމެން މިހާރު ވަނީ ސަލާމަތުގެ އައްސޭރިއަށް ގެންގޮސްފައިކަމަށް އެމްއެންޑީއެފުން ވަނީ ވިދާޅުވެފައެވެ. ގެއްލިގެން ހޯދަމުންދަނީ ލ. މާވަށަށް ނިސްބަތްވާ ޢުމުރުން 25 އަހަރުގެ ޢަލީ މުޝްފިޤް ނަމަކަށް ކިޔާ މީހެއްކަމަށް އެމްއެންޑީއެފުން މަޢުލޫމާތުދެއެވެ. 

މީގެ އިތުރުން އެމްއެންޑީއެފުން ވިދާޅުވީ، ޢަލީ މުޝްފިޤް ހޯދުމުގެ މަސައްކަތުގައި އެމްއެންޑީއެފް ސެންޓްރަލް އޭރިއާ ކޮމާންޑް ކޯސްްޓްގާޑާއި އެ ސަރަޙައްދުގެ ގިނަ އުޅަނދުތަކެއް ޙަރަކާތްތެރިވަމުން ދާކަމަށެވެ. ހަމަ އެހެންމެ، އަލިފާން ރޯވި ބޯޓު އޮތް ސަރަޙައްދުގައި ފުލުހުން ވެސް އަންނަނީ ޙަރަކާތްތެރިވަމުންނެވެ.

އަލިފާން ރޯވެފައިވާ ހޮޅުދޫ ބޯޓަކީ، ތ. ހިރިލަންދޫ އިން ފުރައިގެން މާލެއަށް ދަތުރުކުރަމުން ދިޔަ ބޯޓެކެވެ. އަދި އެބޯޓުގައި ލ. މާވަށް އަލި ތ. ހިރިލަންދޫ މީހުންވެސް ދަތުރުކުރެއެވެ.

މި ބޯޓުގައި އަލިފާނުގެ ހާދިސާ ހިނގަން މެދުވެރިވި ސަބަބެއް އަދި ސާފުވެފައެއް ނުވެއެވެ.