މުދާ އުފުލާ ބޯޓުގެ އަލިފާނުގެ ޙާދިސާ: ގެއްލުނު މީހާ ހޯދުމަށް ޑްރޯން ބޭނުންކުރަނީ

ތ. ހިރިލަންދޫން މާލެއަށް ދަތުރުކުރަމުންދިޔަ "ހޮޅުދޫ ބޯޓު" ނަމަކަށް ކިޔާ މުދާ އުފުލާ ބޯޓުގައި ރޭ 21:07 ހާއިރު އަލިފާން ރޯވެ، އެއްކޮށް އަނދައި ހުލިވުމާ ގުޅިގެން ގެއްލުނު މީހަކު ހޯދުމުގެ މަސައްކަތް ދަނީ ކުރެވެމުންނެވެ. މި ކަމާ ގުޅޭ ގޮތުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މަޢުލޫމާތު ދެއްވާފައިވެއެވެ.

އެމްއެންޑީއެފުން ދެއްވާފައިވާ މަޢުލޫމާތުގައިވާ ގޮތުން، މި ބޯޓު ރޭ ދަންވަރު 02:07 ހާއިރު މުޅިން އަޑިއަށް ގޮސްފައިވެއެވެ. ބޯޓުގައި ދަތުރުކުރި 18 މީހުންގެ ތެރެއިން 17 މީހުން ވަނީ ސަލާމަތްކުރެވިފައެވެ. އެހެންނަމަވެސް، ލ. މާވަށަށް ނިސްބަތްވާ 25 އަހަރުގެ ޢަލީ މުޝްފިގް މުޙައްމަދު ޝަރީފް އަދިވެސް ވަނީ ނުފެނިފައެވެ.

އެމްއެންޑީއެފް ކޯސްޓްގާޑް ޝިޕް ޢާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން ޢަލީ މުޝްފިޤް ޝަރީފް ހޯދުމުގެ މަސައްކަތް ދަނީ ކުރަމުން.

— Maldives National Defence Force (@MNDF_Official) April 3, 2025

ގެއްލުނު ފަރާތް ހޯދުމަށްޓަކައި ކޯސްޓްގާޑްގެ ތިން އުޅަނދުގެ އިތުރުން، ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން މަސައްކަތް ދަނީ ކުރަމުންނެވެ. އަލިފާނުގެ ހާދިސާ ހިނގި ވަގުތުން ފެށިގެން އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑުން ވަނީ އަލިފާން ނިއްވުމުގެ މަސައްކަތުގައި ހަރަކާތްތެރިވެފައެވެ.

ލ. މާވަށު ކައުންސިލްގެ ރައީސް އަޙްމަދު މޫސާ ވިދާޅުވި ގޮތުގައި، މި ބޯޓަކީ މާވަށަށާއި ހިރިލަންދޫއަށްވެސް ދަތުރުކުރާ ބޯޓެކެވެ. އަދި މި ދެ ރަށުގެ ރައްޔިތުންވެސް މި ބޯޓުން ދަތުރުކުރާކަމަށް އެމަނިކުފާނު ވިދާޅުވިއެވެ.

ބޯޓު އަޑިއަށް ގޮސް، އޭގެ ބައިތައް އޮޔާދާތީ އެ ސަރަހައްދުން ދަތުރުކުރާ ފަރާތްތަކުން ޚާއްޞަ ސަމާލުކަމެއް ދިނުމަށް އެމްއެންޑީއެފުން ވަނީ އިލްތިމާސްކުރައްވާފައެވެ. ނަމަވެސް، މި ހާދިސާ ހިނގަން ދިމާވި ސަބަބު އަދި ވަނީ ނޭނގިފައެވެ.