ޢައްޒާގައި ހުންނަ އދ.ގެ މެޑިކަލް ކްލިނިކަށް ދިން ހަމަލާގައި ޝަހީދުވި މީހުންގެ ޢަދަދު 80އަށް

އިއްޔެ ޣައްޒާގައި ހުންނަ އދ.ގެ މެޑިކަލް ކްލިނިކަށް އަމާޒުކޮށް އިޒްރާއިލުން ދިން ހަމަލާގައި ޝަހީދުވި މީހުންގެ ޢަދަދު ގާތްގަނޑަކަށް 80 އަށް އަރާނެ ކަމަށް ލަފާކޮށްފިއެވެ.

މިހަމަލާގެ ސަބަބުން ޝަހީދުވީ މީހުންގެ ތެރޭގައި ގިނަ ޢަދަދެއްގެ ކުދަކުދިންނާއި އަންހެނުންވެސް ހިމެނެއެވެ. 

އިއްޔެ އދ.ގެ ކްލިނިކަށް ދިން މިހަމަލާގައި ގިނަ ބަޔަކު ޝަހީދުވެ އެކަމުން އަރައިނުގަނެވި އުޅެނިކޮށް ޣައްޒާގެ އެކި ސަރަހައްދުތަކުގައި މީހުން ބޯހިޔާވަހިކަން ހޯދަމުންދާ ތަންތަނަށް އިޒްރާއިލުން ދަނީ ބޮން އަޅަމުންނެވެ. 

ޣައްޒާގެ މެޑިކަލް މަސްދަރުތަކަށް ހަވާލާދީ އަލްޖަޒީރާގައި ބުނެފައިވަނީ ރޭ ފަތިހުން ފެށިގެން މިހާތަނަށް ޝަހީދުވި މީހުންގެ ޢަދަދު 77އަކަށް އަރައިފައިވާކަަމަށެވެ. 

ޙާން ޔޫނިސްގައި ޓެންޓެއްގައި ތިބި ބަޔަކަށް ދިން ހަމަލާއެއްގައި ކުޑަކުއްޖެއް ޝަހީދުވެފައިވާއިރު ޙާން ޔޫނިސްގެ އެކި ސަރަހައްދުތަކަށް ދިން ހަމަލާތަކުގައި 14 މީހަކު ވަނީ ޝަހީދުވެފައެވެ.

ހަމަލާތައް ހުއްޓާލުމުގެ އެއްބަސްވުމާއި ޚިލާފުވެ އިޒްރާއިލުން ޣައްޒާއަށް ހަމަލާދޭން ފެށިފަހުން ހަމަލާތައް ދިނުމުގައި އިންޒާރުދިނުން ދޫކޮށް ހަމަލާދިނުން މިހާރުވަނީ ގިނަވެފައެވެ. މިފަދަ ހަމަލާތަކުގެ ސަބަބުން ޝަހީދުވާމީހުންގެ ޢަދަދުއަންނަނީ އިތުރުވަމުންނެވެ.