ދުނިޔެ
އެތައް އަހަރެއް ވަންދެން ދޮރުގަ ލައްކުރަން ބޭނުންކުރި ހިލައަކީ 1.1 މިލިއަން ޑޮލަރުގެ އަގުހުރި އެމްބަރއެއް

އެމްބަރ ފޮޓޯ:އިންޓަނެޓް
ރޮމޭނިއާގެ އަންހެނަކު އެތައް އަހަރެއް ވަންދެން ދޮރުގައި ލައްކުރަން ބޭނުންކުރި ހިލައަކީ 3.5 ކިލޯގެ އެންބަރއެއް ކަމަށް ވަނީ ފަހުން ހާމަވެފައެވެ. މި އެންބަރގެ އަގު އަންދާޒާ ކުރެވެނީ 1.1 މިލިއަން އެމެރިކާ ޑޮލަރަށް އަރާނެ ކަމަށެވެ. މިއީ މިހާތަނަށް ފެނިފައިވާ އެންމެ ބޮޑެތި އެންބަރގެ ތެރެއިން އެއް އެންބަރއެވެ.
ރޮމޭނިއާގެ ދެކުނު އިރުމަތީ ސަރަހައްދުގައި ހުރި ކޯއްޓެއްގެތެރެއިން މި އެންބަރ ފެނުނީ އެ އަންހެން މީހާއަށެވެ. އެންބަރއަކީ ގަސްގަހުން ނުކުންނަ ރެޒިންއިން ގަލަކަށް ވެފައިވާ އެއްޗެކެވެ. މި އެންބަރ ފެނުނު ކޯލްޓީ ނަމަކަށް ކިޔާ ރަށަކީ 1920 ގެ އަހަރުތަކުން ފެށިގެން އެންބަރ ހޯދުމަށް މަސައްކަތްކުރާ ރަށެކެވެ. މި އެންބަރއަކީ ރުމަނައިޓް ކިޔާ ބާވަތެއްގެ އެންބަރެވެ. މިއީ ރަތް ކުލައިގައި ހުންނަ އެންބަރއެކެވެ.
އެލް ޕައިސް ނަމަކަށް ކިޔާ ނޫހެއްގައި ވާގޮތުން، މި އެންބަރ ވަނީ ޕޮލެންޑްގެ ކްރަކޯ ހިސްޓްރީ މިއުޒިއަމްގެ މާހިރުންނާ ހަވާލުކޮށްފައެވެ. އެ މިއުޒިއަމްގައި އަގުބޮޑު ހިލަތައް ދިރާސާކުރުމަށް ޚާއްޞަ ބައެއް ހުރެއެވެ. އެ މާހިރުން ވަނީ މި އެންބަރގެ އުމުރަކީ 38.5 މިލިއަން އަހަރާއި 70 މިލިއަން އަހަރާ ދެމެދުގެ އުމުރެއް ކަމަށް ލަފާކޮށްފައެވެ.
ބުޒާއު ޕްރޮވިންޝަލް މިއުޒިއަމްގެ ޑިރެކްޓަރު ޑެނިއަލް ކޮސްޓާޗް ބުނި ގޮތުގައި މި އެންބަރު ފެނުމަކީ ސައިންޓިފިކް ގޮތުންނާއި މިއުޒިއަމްގެ ގޮތުން ވަރަށް މުހިންމު ކަމެކެވެ. އޭނާ ބުނި ގޮތުގައި މިއީ ދުނިޔޭގައި ފެނިފައިވާ އެންމެ ބޮޑެތި އެންބަރގެ ތެރެއިން އެއް އެންބަރއެވެ.
މި އެންބަރ ފެނުނު އަންހެން މީހާ 1991 ވަނަ އަހަރު ނިޔާވުމަށްފަހު، އޭނާގެ ޢާއިލާގެ މީހަކު މި އެންބަރގެ އަގު ހުރި ކަން ދެނެގަނެ، ރޮމޭނިއާ ސަރުކާރަށް ވަނީ ވިއްކާލާފައެވެ. މިހާރު މި އެންބަރ ބަހައްޓާފައި ވަނީ ބުޒާއު ޕްރޮވިންޝަލް މިއުޒިއަމްގައެވެ.