އީލޮން މަސްކް އެކްސް މީޑިއާ ޕްލެޓްފޯމް 33 ބިލިއަން ޑޮލަރަށް ވިއްކާލައިފި

މަޝްހޫރު ބިލިއަނަރު  އީލޮން މަސްކް އޭނާގެ މިލްކިއްޔާތުގައިވާ ސޯޝަލް މީޑިއާ ޕްލެޓްފޯމް އެކްސް ، އޭނާގެ އަމިއްލަ އާޓިފިޝަލް އިންޓެލިޖެންސް ކުންފުނި އެކްސްއޭއައި (xAI) އަށް 33 ބިލިއަން ޑޮލަރަށް ވިއްކާލައިފިއެވެ. މި މުޢާމަލާތަކީ ހިއްސާގެ މުޢާމަލާތެއްކަމަށް މަސްކް ހުކުރު ދުވަހު ހާމަކުރިއެވެ.

މި ދެ ކުންފުންޏަކީވެސް އާންމުންނަށް ހިއްސާ ނުވިއްކާ ޕްރައިވެޓް ކުންފުނިތަކަކަށްވުމާއެކު، މި ކުންފުނިތަކުގެ މާލީ ހާލަތު އާންމުކުރުމަކީ މަޖުބޫރު ކަމެއް ނޫނެވެ.

އެކްސްގައި ކުރި ޕޯސްޓެއްގައި މަސްކް ބުނެފައިވަނީ މި މުޢާމަލާތުގެ ސަބަބުން "އެކްސްއޭއައިގެ އެޑްވާންސްޑް އޭއައި ޤާބިލުކަމާއި ތަޖުރިބާ އެކްސްގެ ބޮޑު އާންމު އަޑުއެހުމާ އެކުވެގެން ވަރަށް ބޮޑު ކުރިއެރުމެއް ލިބިގެންދާނެ" ކަމަށެވެ. މި މުޢާމަލާތުގައި އެކްސްއޭއައިގެ އަގު 80 ބިލިއަން ޑޮލަރު އަދި އެކްސްގެ އަގު 33 ބިލިއަން ޑޮލަރުގައި ކަނޑައަޅާފައިވާ ކަމަށް އޭނާ ބުނެފައިވެއެވެ.

ޓެސްލާ އަދި ސްޕޭސްއެކްސްގެ ސީއީއޯ އަދި އެމެރިކާގެ ރައީސް ޑޮނަލްޑް ޓްރަމްޕްގެ ލަފާދޭ ފަރާތެއްގެ ގޮތުގައި މަސައްކަތްކުރާ މަސްކް، ކުރިން ޓްވިޓަރ ގެ ނަމުގައި އޮތް މި ސޯޝަލް މީޑިއާ ސައިޓް 2022 ވަނަ އަހަރު 44 ބިލިއަން ޑޮލަރަށް ގަނެ، އޭގެ މުވައްޒަފުންގެ އަދަދު މަދުކޮށް، ނަފްރަތުގެ ވާހަކަ، ދޮގު މަޢުލޫމާތު އަދި ޔޫޒަރުން ވެރިފައިކުރުމުގެ ސިޔާސަތުތަކަށް ބަދަލުގެނެސް، އޭގެ ނަން އެކްސް އަށް ބަދަލުކުރިއެވެ. އަދި އޭގެ އަހަރެއްފަހުން އެކްސްއޭއައި އުފެއްދިއެވެ.

މި ބަދަލުގެ ސަބަބުން އެކްސްގެ ބޭނުންކުރާ ފަރާތްތަކަށް އެއްވެސް ބަދަލެއް އަންނާނެތޯ އަދިސާފެއް ނުވެއެވެ. އެކްސްއޭއައި އިން މިހާރުވެސް އެކްސްގެ ޔޫޒަރުންގެ ޕޯސްޓްތަކުގެ ޑޭޓާ ބޭނުންކޮށްގެން އެ ކުންފުނީގެ އާޓިފިޝަލް އިންޓެލިޖެންސް މޮޑެލްތައް ތަމްރީނުކުރަމުންދެއެވެ. އަދި އެކްސްގެ ފައިސާ ދައްކާ ޔޫޒަރުންނަށް އެކްސްއޭއައިގެ ޗެޓްބޮޓް "ގްރޮކް" ބޭނުންކުރެވެއެވެ. އަދި ފައިސާ ނުދައްކާ ޔޫޒަރުންނަށް ކޮންމެ ދެ ގަޑިއިރަކުން 10 ސުވާލު ކުރުމުގެ ފުރުސަތު ލިބެއެވެ.

މި މުއާމަލާތަކީ އެމެރިކާގެ ޓެކްނޮލޮޖީ ދާއިރާގައި މިހާތަނަށް ހިނގާފައިވާ އެންމެ ބޮޑު މުޢާމަލާތްތަކުގެ ތެރެއިން އެއް މުޢާމަލާތެވެ. މީގެ ކުރިން 2022 ވަނަ އަހަރު މަސްކް  ޓްވިޓަރ ގަތުމަށް 44 ބިލިއަން ޑޮލަރު ހޭދަކުރިއެވެ. އަދި މިއަހަރުގެ ތެރޭގައި މައިކްރޯސޮފްޓް އިން އެކްޓިވިޝަން ބްލިޒާޑް 69 ބިލިއަން ޑޮލަރަށް ގަތުމުގެ މުޢާމަލާތް ހިންގިއެވެ.

މި މުޢާމަލާތުގެ ސަބަބުން އެކްސް އަދި އެކްސްއޭއައި އެއް ކުންފުންޏެއްގެ ދަށަށް އައުމާއެކު، އެކްސްގެ ޔޫޒަރުންގެ ޑޭޓާ އާޓިފިޝަލް އިންޓެލިޖެންސް ތަރައްޤީކުރުމަށް ބޭނުންކުރުމުގެ ފުރުސަތު އިތުރަށް ފަހިވެގެންދާނެ ކަމަށް ބެލެވެއެވެ. ނަމަވެސް މިކަމާ ގުޅިގެން ޑޭޓާ ރައްކާތެރިކަމާއި ޕްރައިވަސީއާ ގުޅޭ ކަންބޮޑުވުންތައް އުފެދިފައިވެއެވެ.

މި މުޢާމަލާތާ ގުޅިގެން އެމެރިކާގެ ރެގިއުލޭޓަރީ އިދާރާތަކުން އަދި އެއްވެސް ބަހެއް ބުނެފައެއް ނުވެއެވެ. ނަމަވެސް މިފަދަ ބޮޑެތި ޓެކްނޮލޮޖީ ކުންފުނިތައް އެއްކޮށްލުމާ ގުޅުވާ ސަރުކާރުގެ ފަރާތުން ސުވާލު އުފެދުމަކީ އެކަށީގެންވާ ކަމެކެވެ.