ގއ. ގެމަނަފުށީގައި ފުލުހުންގެ ވޯކް އެންޑް ޓޯކް ޙަރަކާތެއް ކުރިއަށް ގެންގޮސްފި

ގއ. ގެމަނަފުށީގައި ދިވެހި ފުލުހުންގެ ޚިދުމަތުން ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ.

ދިވެހި ފުލުހުންގެ ޚިދުމަތުން ވިދާޅުވީ، މި ހަރަކާތަކީ ރައްޔިތުންނާއި ގާތުން ބައްދަލުކޮށް މަޢުލޫމާތު ދިނުމުގެ މަޤްސަދުގައި ކުރިއަށްގެންދާ ހަރަކާތެއް ކަމަށެވެ. 

މި ހަރަކާތުގައި ގއ. ގެމަނަފުށީ ޕޮލިސް ސްޓޭޝަނުގެ ފުލުހުން ވަނީ އެ ރަށުގެ އެކި ސަރަޙައްދުތަކަށް ޒިޔާރަތްކުރައްވާ، ރައްޔިތުންނާއި ބައްދަލުކޮށް ތަފާތު މުހިންމު މަޢުލޫމާތުތަކެއް ދީފައެވެ. އެގޮތުން، ރަށުތެރޭގައި ހިނގާ ކުށްތަކުން ސަލާމަތްވެ ތިބުމަށް ކުރެވިދާނެ ކަންތައްތައް ފުލުހުން ވަނީ ކިޔާދީފައެވެ. ހަމަ އެހެންމެ، މުދަލާއި ގެދޮރުގެ ސަލާމަތާއި ރައްކާތެރިކަމަށް އިތުރަށް ކުރެވިދާނެ ކަންކަމާ އަދި ސްކޭމްގެ މައްސަލަތަކުން ރައްކާތެރިވެތިބުމަށް ކުރެވިދާނެ ކަންކަން ވެސް ވަނީ ކިޔައިދެއްވާފައެވެ.

މީގެ އިތުރުން، މި ޙަރަކާތުގެ ދަށުން ފުލުހުން ވަނީ ފުލުހުންގެ ޚިދުމަތާއި މެދު އެރަށުގެ ރައްޔިތުންގެ ޚިޔާލު ހޯއްދަވާފައެވެ. ހަމަ އެހެންމެ، ރައްޔިތުންގެ ހުރި ކަންބޮޑުވުންތައް އޮޅުންފިލުވައި، ފުލުހުންނާ ގުޅިގެން އެ ކަންކަން ހައްލުކުރުމަށް ކުރެވިދާނެ ކަންކަމާ ގުޅޭގޮތުން ވެސް ވަނީ މަޝްވަރާކުރައްވާފައެެވެ. އަދި ފޯނަށް އަންނަ ގޮތްނޭނގޭ ތަފާތު އެކި ލިންކުތަކަށް ނުވަނުމަށާއި، އޯޓީޕީ ކޯޑު ފަދަ މުހިންމު މައުލޫމާތު އެއްވެސް މީހަކާ ހިއްސާނުކުރުމަށް ފުލުހުން ވަނީ ނަސޭހަތްތެރިވެފައެވެ.

ދިވެހި ފުލުހުންގެ ޚިދުމަތުން ވަނީ ރާއްޖޭގެ އެކި ކަންކޮޅުތަކުގައި މީގެ ކުރިން ވެސް ވޯކް އެންޑް ޓޯކް ގެ ހަރަކާތްތަކެއް ހިންގައިފައެވެ. އަދި ކުރިއަށް އޮތް ދުވަސްތަކުގައި މި ހަރަކާތް އެކި ރަށްރަށުގައި ކުރިއަށްދާނެއެވެ.