ނ. މަގޫދޫގައި ރޭ ހިނގި އަލިފާނުގެ ޙާދިސާއެއްގައި، އަލިފާން ނިއްވަން އުޅުނު މީހަކަށް އަނިޔާވެއްޖެ

ނ. މަގޫދޫގައި ރޭ ހިނގި އަލިފާނުގެ ޙާދިސާއެއްގައި، އެ އަލިފާންގަނޑު ނިއްވާލުމުގެ މަސައްކަތުގައި ޙަރަކާތްތެރިވި މީހަކަށް އަނިޔާވެއްޖެއެވެ.

މަގޫދޫގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މަޢުލޫމާތު އެރަށު ކައުންސިލަށް ލިބިފައިވަނީ، ރޭ މަޣްރިބް ނަމާދަށް ފަހުގައެވެ. އަލިފާން ރޯވެފައިވަނީ އެރަށުގައި ދޫކޮށްފައިވާ ގެވަޅުތަށް ސާފުކޮށްފައި އެއްކޮށްފައި އޮތް ގިނަ އަދަދެއްގެ ކުނިތަކެއްގައެވެ.

މި ސަރަޙައްދުގައި ރޯވި އަލިފާން ނިއްވުމަށް އެންމެ ފުރަތަމަ މަސައްކަތް ކޮށްފައިވަނީ ޝިޔާމް ވޯލްޑުގެ ފަޔަރ ފައިޓަރުންގެ ޓީމެއްކަމަށް އެރަށު ކައުންސިލުން މަޢުލޫމާތުދެއެވެ. ނަމަވެސް، އެ ޓީމުގެ ޕަންޕަށް ދިމާވި މައްސަލައަކާއި ގުޅިގެން އެ މަސައްކަތް ހުއްޓުނެވެ. އަދި އެ މަސައްކަތުގެ ތެރޭގައި، އެ ރިސޯޓްގެ ފަޔަރ ފައިޓަރެއްގެ ފައިގައި ވަރަށް ބާރަށް ފެން ހޮޅިއެއް ނައްޓައިގެން ޖެހި ވަނީ އަނިޔާވެފައެވެ. އެހެންކަމުން، މި މީހާއަށް މަގޫދޫ ހެލްތު ސެންޓަރުގައި ފަރުވާދިނުމަށް ފަހު  އިތުރު ފަރުވާއަށް ވަނީ މަނަދޫ ހޮސްޕިޓަލަށް ގެންގޮސްފައެވެ.

މަގޫދު ކައުންސިލުން މަޢުލޫމާތުދޭ ގޮތުގައި، އެ ސަރަޙައްދަކީ ގާތްގަނޑަކަށް 20،000 އަކަފޫޓުގެ ސަރަޙައްދެކެވެ. އަަދި އަލިފާން ރޯވި ވަގުތު އެތާނގައި ބޮޑަށް ހުރީ ލަކުނޑި ކަހަލަ ބޮޑެތި އެއްޗިހިކަމަށް މަޢުލޫމާތު ލިބެއެވެ. މި އަލިފާންގަނޑު ނިއްވާލެވިފައިވަނީ އެމްއެންޑީއެފްގެ ފަޔަރ ފައިޓަރުން އެ ރަށަށް ގޮސް، ރޭ ދަންވަރު 3:45 ހާއިރުއެވެ. އެ ސަރަޙައްދުގައި އަލިފާނެ ރޯވާން މެދުވެރިވި ސަބަބެއް އަދި އެނގިފައެއް ނުވެއެވެ.