އިންޑިއާއިން ދިވެހިރާއްޖެއަށް ދޫކުރާ އެކްސްޕޯޓް ކޯޓާ އިތުރުކުރުމުން ރާއްޖެއިން ޝުކުރުއަދާކޮށްފި

އިންޑިއާއިން ދިވެހިރާއްޖެއަށް ދޫކުރާ އެކްސްޕޯޓް ކޯޓާ އިތުރުކުރުމުން ރާއްޖެއިން ޝުކުރުއަދާކޮށްފިއެވެ.

އިންޑިއާއިން ރާއްޖެއަށް އެތެރެކުރާ ޒަރޫރީ ބާވަތްތައް ރާއްޖެއަށް އެތެރެކުރުމަށް ކަނޑައަޅާފައިވާ މިންވަރު އިތުރުކޮށްދިނުމާއި ގުޅިގެން އެކަމަށްޓަކައި ޝުކުރުއަދާކުރެއްވުމަށް ޚާރިޖީ ވުޒާރާއިން ވަނީ އެކްސްގައި ޕޯސްޓެއްކޮށްފައެވެ.

މި ޕޯސްޓުގައި ރާއްޖޭގެ ޚާރިޖީ ވުޒާރާއިން ވިދާޅުވީ، މިކަމާއި ގުޅިގެން ދިވެހި ސަރުކާރުގެ ނަމުގައި ޝުކުރުއަދާކުރައްވާ ކަމަށެވެ. އަދި މިކަމުގެ ސަބަބުން، ދެ ޤައުމުގެ ދެމެދުގައި އޮތް ގާތް ގުޅުން ފާހަގަވާކަމަށް އެ ވުޒާރާއިން ވަނީ ވިދާޅުވެފައެވެ. ހަމަ އެހެންމެ، އިންޑިއާއިން ރާއްޖެއަށް އެކި ކަންކަމުގައި ދެމުން ގެންދަވާ އެހީތެރިކަން ފާހަގަކޮށް ޚާރިޖީ ވުޒާރާއިން ވަނީ އެކަމަށް ވެސް ޝުކުރު ދަންނަވާފައެވެ. 

ދިވެހިރާއްޖޭގައި ހުންނަ އިންޑިއާ ހައި ކޮމިޝަނުން ކުރިން ހާމަކުރި ގޮތުގައި، ދިވެހިރާއްޖޭގެ އިމާރާތްކުރުމުގެ ދާއިރާއަށް މުހިންމު ވެއްޔާއި ހިލައިގެ ކޯޓާ 30 އިންސައްތަ އިތުރުކޮށް، 1.3 މިލިއަން މެޓްރިކް ޓަނަށް އިތުރުކޮށްފައިވެއެވެ. މީގެ އިތުރުން، ބިސް، އަލުވި، ފިޔާ، ހަކުރު، ހަނޑޫ އަދި ފުށުގެ ކޯޓާ 5 އިންސައްތަ އިތުރުކޮށްފައިވާއިރު، މުގު ފަދަ ތަކެތީގެ ކޯޓާ 56 އިންސައްތަ އިތުރުކޮށްފައިވެއެވެ. މިއީ ދިވެހިރާއްޖޭގެ ކާބޯތަކެތީގެ ރައްކާތެރިކަމާއި އިޤްތިޞާދީ ހަރުދަނާކަން ދެމެހެއްޓުމަށް އިންޑިއާއިން ދޭ އަހައްމިއްޔަތުކަން ދައްކުވައިދޭ ކަމެކެވެ.

1981 ގައި މި އެއްބަސްވުން ފުރަތަމަ ޤާއިމުކުރެވުނު ފަހުން މިހާތަނަށް ދޫކޮށްފައިވާ އެންމެ ބޮޑު ކޯޓާ ކަމަށްވާ މި އިޞްލާޙުގެ ސަބަބުން ދިވެހިރާއްޖޭގެ އިމާރާތްކުރުމުގެ ޞިނާޢަތާއި ކާބޯތަކެތީގެ ސަޕްލައި ޗެއިނަށް ފައިދާވާނެއެވެ.