ޚަބަރު
ކުރިއަށް އޮތް ދެ ދުވަހު ވީއައިއޭއަށް ބާރުބޮޑުވާނެކަމަށް ލަފާކޮށް ފުލުހުންގެ އިރުޝާދުތަކަށް ޢަމަލުކުރުމަށް އެދެފި

ވީއައޭގައި ފަތުރުވެރިންތަކެއް/ފޮޓޯ: އެޑިޝަން އެމްވީ
ކުރިއަށް އޮތް ދެ ދުވަހު ވެލާނާ އިންޓަނޭޝަނަލް އެއާޕޯޓް، ވީއައިއޭއަށް ބާރުބޮޑުވާނެކަމަށް ލަފާކޮށް ފުލުހުންގެ އިރުޝާދުތަކަށް ޢަމަލުކުރުމަށް ދިވެހި ފުލުހުންގެ ޚިދުމަތުން އެދެފިއެވެ.
އެކްސްގައި ކުރެއްވި ޕޯސްޓެއްގައި ފުލުހުން ވިދާޅުވީ، މާދަމާ އަދި އޭގެ އަނެއް ދުވަހަކީ، ގިނަ ޢަދަދެއްގެ ޢުމްރާވެރިންނާއި، ފިޠުރު ޢީދު ޗުއްޓީއާއި ގުޅިގެން ވެލާނާ އިންޓަރނޭޝަނަލް އެއަރޕޯޓަށް ޒިޔާރަތްކުރާ މީހުންގެ ޢަދަދު އިތުރުވާނެ ދުވަހެއް ކަމަށެވެ. އަދި މިކަމުގެ ސަބަބުން އެއަރޕޯޓުގެ ޓްރެފިކް ފްލޯއަށް ބާރުބޮޑުވާނެކަމަށް ލަފާކުރެވޭކަމަށް ފުލުހުން ވަނީ ވިދާޅުވެފައެވެ.
މިކަމާއި ގުޅިގެން، ކުރިއަށް އޮތް ދެ ދުވަހު ވެލާނާ އިންޓަރނޭޝަނަލް އެއަރޕޯޓަށް ދަތުރު ކުރާ އެއްގަމު އުޅަނދުފަހަރު ދުއްވާ ފަރާތްތަކުން ދިވެހި ފުލުހުންގެ ޚިދުމަތުން ދޭ އިރުޝާދުތަކާއި އެއްގޮތަށް ޢަމަލުކުރުމަށް ފުލުހުން ވަނީ އިލްތިމާސްކުރައްވާފައެވެ.
ފުލުހުން ވަނީ، މިފަދަ ކަންކަމުގައި ޢާންމު ރައްޔިތުންގެ ފަރާތުން ލިބިލައްވާ އެއްބާރުލުން ފާހަގަކުރައްވާ، އެކަމަށް ޝުކުރު ދަންނަވާފައެވެ.