ޚަބަރު
ތިލަމާލެ ބުރިޖުގައި އެންމެ ފަހުން ޤާއިމްކުރި ތަނބުހާ އުސް ތަނބެއް މީގެ ކުރިން ދުނިޔެއަކު ނެތް: އިންޑިއާ
ތިލަމާލެ ބުރިޖުގައި ބިނާކުރި އެންމެ އުސް ޕްރީކާސްޓު ސެގްމެންޓު، ފޮޓޯ: އިންޑިއާ ހައިކޮމިޝަން
ތިލަމާލެ ބުރިޖުގައި އެންމެ ފަހުން ޤާއިމްކުރި ޕްރީކާސްޓު ތަނބުހާ އުސް ތަނބެއް މީގެ ކުރިން ދުނިޔޭގައި ބިނާކޮށްފައި ނުވާކަމަށް، ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ބުނެފިއެވެ. ހައިކޮމިޝަނުން މިކަން ހާމަކުރީ އެކްސްގައި ކުރި ޕޯސްޓެއްގައެވެ.
މި ޕްރީކާސްޓް ތަނބުގައި 8.2 މީޓަރުގެ އުސްމިން ހުންނައިރު، އޭގައި 25.3 މީޓަރުގެ ފުޅާމިނެއް ހުންނަ ކަމަށް އެ ކޮމިޝަނުން ވަނީ މައުލޫމާތު ދީފައެވެ. އަދި 216.04 މެޓްރިކް ޓަނުގެ ބަރުދަން ހުންނަ އެ ޕްރީކާސްޓް ގާއިމުކުރެވުމަކީ އިންޖީނިއަރިން ދާއިރާއަށް ލިބުނު ކުރިއެރުމެއްކަމަށް ކޮމިޝަނުން ވަނީ ހާމަކޮށްފައެވެ.
A Day of Special Achievement
— India in Maldives (@HCIMaldives) April 3, 2025
On 3 April, 2025, the tallest precast navigation span segment in the world under the 🇮🇳 🇲🇻 Greater Male Connectivity Project was erected by Afcons. The 8.23m tall and 25.37m wide segment weighs 216.04 MT and is an engineering marvel. pic.twitter.com/Zy6YI5L7E1
މި ކާމިޔާބީއާއި ގުޅިގެން އިމާރާތްކުރުމާ ގެދޮރުވެރިކަމާ ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް އެކްސްގައި ކުރެއްވި ޕޯސްޓެއްގައި ވިދާޅުވީ، މި ކާމިޔާބާއެކީ ބްރިޖުގެ މަސައްކަތުގެ ދުވެލި އަވަސްވެ، ތާވަލާ އެއްގޮތަށް މަސައްކަތް ނިންމޭނެކަމަށް އުންމީދުކުރައްވާކަމަށެވެ.
އަދި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު ޖީ. ބަލަސުބްރަމާނިއަމް މި މަޝްރޫއަށް ބަހައްޓަވާ އަހަންމިއްޔަތުކަން ފާހަގަކުރައްވާ ވަޒީރު ވަނީ ސަފީރަށް ޝުކުރު އަދާކުރައްވާފައެވެ.
With this significant milestone, the Government of Maldives expects work to accelerate to ensure project completion as scheduled. I thank High Commissioner H.E. G. Balasubramaniam for his close coordination. https://t.co/4hGYTQeJ9C
— Abdulla Muththalib (@muththo) April 3, 2025
މި ބުރިޖަކީ މާލެ ސަރަޙައްދުގައި ދިރިއުޅޭ ގިނަ ބައެއްގެ އުއްމީދާ ގުޅިފައިވާ ބްރިޖެކެވެ. އަދި މި ބުރިޖުގެ ސަބަބުން، އެ ސަރަޙައްދުގެ އިޤްތިޞާދީ ދުވެއްޔަށް ވެސް ކުރިއެރުންތައް ލިބިގެންދާނެކަމަށް ޤަބޫލުކުރެވެއެވެ.
މި މަސައްކަތް ރާވާފައިވާ ގޮތުން، މާލެއިން ގުޅިފަޅަށް ގުޅާލާ ނިމޭނީ އަންނަ އަހަރުގެ މާރިޗު މަހެވެ. އަދި އެއަށްފަހު ގުޅުފަޅުން ތިލަފުއްޓަށް ގުޅާލުމުގެ މަސައްކަތް ނިންމޭނީ އަންނަ އަހަރުގެ ސެޕްޓެންބަރު މަހެވެ. މިއާއެކު މުޅި މަޝްރޫޢު ނިމޭނެކަމަށް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026 އަށް ކަމަށް އިމާރާތްކުރުމާއި ބިނާރާބެހޭ ވުޒާރާއިން ވަނީ ހާމަކޮށްފައެވެ.
ތިލަމާލެ ބުރިޖު ނިމޭއިރު، އެ ބްރިޖުގެ ދިގު މިނުގައި 6.7 ކިލޯމީޓަރު ހުންނާނެއެވެ. އަދި މި ބްރިޖުގެ މަސައްކަތަށް މިހާތަނަށް ޖީ.އެސް.ޓީ ނުހިމެނޭހެން 251,563,940.20 (ދުއިސައްތަ ފަންސާސް އެއް މިލިޔަން ފައްސަތޭކަ ފަސްދޮޅަސް ތިންހާސް ނުވަސަތޭކަ ސާޅީސް ޑޮލަރު ވިހި ސެންޓް) ޑޮލަރު ވަނީ ޚަރަދުކޮށްފައެވެ.
