ޚަބަރު
ބޮނަކުއާ ފުޅި ތަކަކަށް ބަނގުރާ އަޅައިގެން ހުޅުމާލޭގައި ދުއްވި ވޭނެއް ހުއްޓުވައިފި

ވޭންއިން ފެނުނު ފުޅިތައް، ފޮޓޯ: ފުލުހުން
ބޮނަކުއާ ފުޅި ތަކަކަށް ބަނގުރާ އަޅައިގެން ހުޅުމާލޭގައި ދުއްވަމުންދިޔަ ވޭނެއް ފުލުހުން ހުއްޓުވައިފިއެވެ.
މި މައްސަލައާ ގުޅިގެން މަޢުލޫމާތު ޙިއްސާކުރަމުން ފުލުހުން ބުނީ، ބަނގުރާކަމަށް ޝައްކުކުރެވޭ ފުޅިތަކެއް އަރުވައިގެން ހުޅުމާލޭގައި ދުއްވަމުން ދިޔަ މި ވޭނުގެ މަޢުލޫމާތު ބުރާސްފަތި ދުވަހުގެ ރޭގެ 21:45 ހާއިރު ލިބުނުކަމަށެވެ.
އަދި ފުލުހުން ވަގުތުން ހަރަކާތްތެރިވެ، މި ވޭން ހޯދާ ހުއްޓުވުމަށްފަހު އެ ވެހިކަލް ބަލާފާސްކުރިއިރު، ބަނގުރާކަމަށް ޝައްކު ކުރެވޭ އެއްޗެއްހުރި ގިނަ ފުޅިތަކެއް ފެނިފައިވާކަމަށް ވަނީ ހާމަކޮށްފައެވެ. އެގޮތުން 500 މިލިލީޓަރުގެ 75 ފުޅި އެ ވެހިކަލްގެ ތެރެއިން ވަނީ ފެނިފައެވެ.
މި ވޭން ދުއްވަން އިނީ ނޭޕާލްއަށް ނިސްބަތްވާ އުމުރުން 37 އަހަރުގެ، ތިރުތާ ބަހާދުރް ކިޔާ ފިރިހެނެއްކަމަށް ވެސް ފުލުހުން ހާމަކޮށްފައި ވެއެވެ.
އެ މީހާ ފުލުހުންގެ ބެލުމުގެ ދަށަށް ގެންދިއުމަށްފަހު، އެ ވެހިކަލް ވެސް ވަނީ މިހާރު ޓޯވކޮށްފައެވެ.
ފުލުހުން ދަނީ މި މައްސަލަ އިތުރަށް ތަހުޤީޤު ކުރަމުންކަމަށް ވަނީ ހާމަކޮށްފައެވެ.