ޗައިނާގެ ޤައުމީ ދުވަހުގެ މުނާސަބަތުގައި އެޤައުމުގެ ވެރިންނަށް ރައީސް މުޢިއްޒު ތަހުނިޔާ ފޮނުއްވައިފި!

ޗައިނާގެ ޤައުމީ ދުވަހުގެ މުނާސަބަތުގައި ޗައިނާގެ ރައީސް ޝީ ޖިންޕިންގްއަށާއި، ދަ ސްޓޭޓް ކައުންސިލް އޮފް ޗައިނާގެ ބޮޑުވަޒީރު ލީ ޗާންގްއަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަހުނިޔާ ވިދާޅުވެއްޖެއެވެ.

އެ ދެބޭފުޅުންނަށް ޤައުމީ ދުވަހުގެ މުނާސަބަތުގައި ތަހުނިޔާ ފޮނުއްވުމަށް ރައީސް މުޢިއްޒު ވަނީ ސިޓީ ފުޅެއް ފޮނުއްވައިފައެވެ. 

އެގޮތުން އެސިޓީ ފުޅުގައި ރައީސް ޑރ މުޢިއްޒު ވަނީ "ވަން-ޗައިނާ ޕޮލިސީ" އަދި، ދެ ޤައުމު ހިއްސާކުރާ ދޭދޭ މަސްލަޙަތު ހިމެނޭ ކަންކަމާ، އިސްތިޤުލާލީ ހަމަހަމަކަމާއި، ސަރަޙައްދީ ނަޒާހާތްތެރިކަން ނުވަތަ ބޭރުގެ ފަރާތަކުން އަތުވެދާނެ ޢުދުވާނަކުން ދިފާޢުވުމަށް ލިބިދީފައި އޮތް ޙައްޤާއި، ދާޚިލީ ކަންކަމުގެ ތެރެއަށް އެހެން ބައެއްގެ ނުފޫޒު ފޯރުވުމާ ދެކޮޅު ސިޔާސަތަށް ދިވެހިރާއްޖޭގެ ފުރިހަމަ ތާއީދު އޮތްކަން ތަކުރާރު ކުރައްވާފައެވެ.

އަދި ދިވެހިރާއްޖެއާއި ޗައިނާއާ ދެމެދުގައި އޮތް ގުޅުން އިތުރަށް ބަދަހިވަމުން ދާނެ ކަމުގެ ޔަޤީންކަން އެބަ އޮތް ކަމަށާ، މި ކުރިއެރުންތަކުގެ ސަބަބުން ދެ ޤައުމަށްވެސް ފައިދާކުރަނިވި ހެޔޮ ބަދަލުތަކެއް ލިބެމުން ދާނެ ކަމަށް ރައީސް މުޢިއްޒުގެ ސިޓީފުޅުގައި ވިދާޅުވެފައިވެއެވެ.

ބޮޑުވަޒީރު ލީ ޗާންގްއަށް ފޮނުއްވި ސިޓީފުޅުގައި ރައީސް މުޢިއްޒު ވަނީ، ދެ ޤައުމުގެ މަސްލަޙަތު އޮތް ހުރިހާ ދާއިރާއަކުން ގުޅުން ބަދަހިކުރުމަށް ދިވެހިރާއްޖެއިން ވެފައިވާ ވަޢުދު ތަކުރާރު ކުރައްވާފައެވެ.

 އަދި ދެ ޤައުމުގެ މެދުގައި މިހާރުވެސް އޮތް ގާތް ގުޅުން އިތުރަށް ބަދަހިކޮށް އަދި މިގުޅުން އާ އުސްމިންތަކަކަށް ގެންދެވޭނެ ކަމުގެ ޔަޤީންކަން އެބަ އޮތްކަން ރައީސް މުޢިއްޒު ވަނީ ފާހަގަކުރައްވާފައެވެ.