އުސްފަސްގަނޑާ ދިމާލުން މޫދުގައި ނިޔާވެފައި އޮތީ ނޫސްވެރިޔާ ޖައުހަރީ!

މާލެ ސިޓީ އުސްފަސްގަނޑާ ދިމާލުން މޫދުން ނިޔާވެފައި އޮއްވައި ފެނުނުނީ އިސްލާޙީ މަސައްކަތުގެ ތެރޭގައި ބުރަ މަސައްކަތް ތަކެއް ކުރެއްވި އިބްރާހިމް ޖައުހަރީ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން ބުނެފައިވަނީ މިކަމުގެ މަޢުލޫމާތު ފުލުހުންނަށް ލިބިފައިވަނީ އިއްޔެގެ 17:06 ހާއިރު ކަމަށެވެ. 

އަދި ޖައުހަރީގެ ހަށިގަނޑު މޫދުން ނަގައިގެން އޭނާގެ ހަށިގަނޑުވަނީ އައިޖީއެމްއެޗް އަށް ގެންގޮސްފައެވެ. އަދި އައިޖީއެމްއެޗް އަށް އޭނާގެ ހަށިގަނޑު ގެންދެވުނު އިރުވެސް ވަނީ ނިޔާވެފައި ކަމަށް އައިޖީއެމްއެޗްއިން ބުނެފައިވާކަމަށް ފުލުހުން ވަނީ ހާމަކޮށްފައެވެ. 

ހަމަމިއާއެކު މިމައްސަލަ ފުލުހުން ތަޙުޤީޤު ކުރަމުންދާ ކަމަށާއި ތަޙުޤިޤަށް މިހާތަނަށް އެނގިފައިވާ ގޮތުން 30 ސެޕްޓެންބަރު 2024 ވަނަ ދުވަހުގެ 15:04 ހާއިރު ބްރިޖް ކައިރިން މޫދަށް މަސްބާނަން ފައިބައިފައި ވާކަމަށް މަޢުލޫމާތު ލިބިފައިވާ ކަމަށް ފުލުހުން ވަނީ ބުނެފައެވެ. 

ޖައުހަރީ އަކީ ރައީސް މައުމޫން ޢަބްދުލްޤައްޔޫމްގެ ވެރިކަން ބަދަލުކުރަން އެމްޑީޕީ އިން ކުރި މަސައްކަތުގެ ކުރީ ސަފުން ވަރަށް ގިނައިން ފެނިފައިވާ ބޭފުޅެކެވެ. 

ޖައުހަރީ ބޮޑަށް ފެނިގެން ގޮސްފައިވަނީ އިސްލާޙީ މަސައްކަތުގެ ތެރެއިން ނުކުމެގެން އައި ނޫސްތަކަށް ފޮޓޯނަގައިދޭ ފޮޓޯގްރާފަރެއްގެ ގޮތުގައެވެ.