ސެޕްޓެންބަރު މަހު އޮގަސްޓު މަހަށްވުރެ ކުށްތައް މަދު!

ފާއިތުވި ސެޕްޓެންބަރު މަހު އޭގެ ކުރީ މަހު ރިޕޯޓް ކުރެވުނު ކުށްތައް މަދު ވެފައިވާ ކަމަށް ދިވެހި ފުލުހުންގެ ޚިދުމަތުގެ ތަރުޖަމާނު އަޙުމަދު ޝިފާން ވިދާޅުވެއްޖެއެވެ.

ފުލުހުން ހާމަކޮށްފައިވާ މިދިޔަ މަހުގެ ކުށްތަކުގެ ތަފާސްހިސާބުތައް އެކްސްގައި ހިއްސާ ކުރައްވަމުން ކުރެއްވި ޕޯސްޓެއްގައި ވިދާޅުވެފައިވަނީ ކުށްތައް މަދުކުރަން ފުލުހުން މިހާރު ހިންގަމުންދާ ޚާއްސަ ހަރަކާތުގެ ދަށުން އެކަށީގެންވާ ރަނގަޅު ނަތީޖާއެއް ފެންނަމުންދާކަމަށެވެ. 

ފުލުހުން ހާމަކޮށްފައިވާ ތަފާސްހިސާބު ތަކުން އިނގޭ ގޮތުގައި އޮގަސްޓް މަހު ވައްކަމުގެ 327 މައްސަލަ ރިޕޯޓުކުރެވުނު އިރު، ސެޕްޓެންބަރު މަހު މި ޢަދަދު ވަނީ 230 އަށް ދަށްވެފައެވެ.

ހަމައެހެންމެ، ޓްރެފިކް އެކްސިޑެންޓްތައް 204 އިން 143 އަށް ދަށްވެފައިވާއިރު، ފޭރުމުގެ މައްސަލަތައް 46 އިން 32 އަށް ދަށްވެފައިވެއެވެ.

މީގެއިތުރުން، މަސްތުވާތަކެތީގެ މައްސަލަތައް 134 އިން 111 އަށް ދަށްވެފައިވެއެވެ. ހަމަމިއާއިއެކު، ގެވެށި އަނިޔާގެ މައްސަލަތައް 31 އިން 11 އަށް، އަދި ޖިންސީ ގޯނާގެ މައްސަލަތައް 43 އިން 12 އަށް ދަށްވެފައިވެއެވެ.

މި ތަފާސްހިސާބުތަކުން ދައްކާގޮތުގައި ރާއްޖޭގައި ވައްކަން، ފޭރުން އަދި ޖުމުލަކޮށް ކުށްކުރުން ވަނީ މަދުވެފައެވެ.

ކުށްތައް މަދުކުރުމަށް ފުލުހުން ކުރަމުންދާ މަސައްކަތަކުގެ ނަތީޖާ ފެންނަމުންދާކަން ފުލުހުންގެ މި ތަފާސް ހިސާބުތަކުން އެނގިގެންދެއެވެ.