ދޮށީޢުމުރުގެ މީހުންނަކީ ކަންކަން ފަހިކުރުމުގެ މޭސްތިރިންގެ ގޮތުގައި ތިބި ތަޖުރިބާކާރުން: ވަޒީރު ޢާއިޝާ

ދޮށީޢުމުރުގެ މީހުންނަކީ ކަންކަން ފަހިކުރުމުގެ މޭސްތިރިންގެ ގޮތުގައި ތިބި ތަޖުރިބާކާރުން ކަމަށް އިޖްތިމާޢީ އަދި ޢާއިލީ ތަރައްޤީ އާ ބެހޭ ވަޒީރު ޑރ ޢާއިޝަތު ޝިހާމް ވިދާޅުވެއްޖެއެވެ. 

ވަޒީރު ޢާއިޝާ މިހެން ވިދާޅުވީ ބައިނަލްއަޤްވާމީ ޢުމުރުން ދުވަސްވީ މީހުންގެ ދުވަހާ ގުޅިގެން އެކަމަނާ ދެއްވެވި ބަސްދީގަތުމުގައެވެ. 

ވަޒީރު ޢާއިޝާ ވިދާޅުވީ ދޮށީ ޢުމުރުގެ މީހުންނަކީ އިއްޔެގެ ޚިދުމަތްތެރީން ކަމަށާއި، ކަންކަން ފަހިކުރުމުގެ މޭސްތިރިންގެ ގޮތުގައި ތިބި ތަޖުރިބާކާރުން ކަމަށެވެ.

އަދި އެބޭފުޅުންނަކީ އެކި ރޮނގު ރޮނގުން ވިދަމުންއައި ފަންނާނުންނާއި ފަންނުވެރިން ކަމަށާއި، ވުމާއެކު، ޢުމުރުން ދުވަސްވުމަކީ ފަހަރެއްގައި ވެސް ހަރަކާތްތެރިވުން މަޑުޖައްސާލާ، ޝާމިލުވެ އުޅުމުން އެކަހެރިވެ، އެކަނިވެރި ޚިޔާލުތަކާއި ފިކުރުން މީހާ ވަށާލަން ޖެހޭ ކަމެއް ނޫން ކަމަށް ވަޒީރު ޢާއިޝާ ވިދާޅުވިއެވެ.

“ދޮށީޢުމުރަކީ ކޮންމެ މީހަކާއި ވެސް ބައްދަލުކުރާނެ ހަޔާތުގެ ފޯވައްސެއް، އެކަމަށް ތައްޔާރުވެ އަބުރުވެރިކަމާއި ޝަރަފުވެރިކަމާއެކު އުޅޭ ބަޔަކަށް ނުވަތަ އެފަދަ މުޖުތަމައަކަށް މި މުޖުތަމައު ބައްޓަންކުރުމަށް ކުރަން ހުރި ކަންކަމުގެ ވާހަކަ ބައިނަލްއަޤްވާމީ ޢުމުރުން ދުވަސްވީ މީހުންގެ ދުވަސް ފާހަގަކުރާއިރު ހަނދާނަށް ކޮންމެހެން ގެނައުން މުހިންމު ކަމުގައި ދެކެން، އެގޮތުން ޢުމުރުން ދުވަސްވަމުންދާއިރު، ދުޅަހެޔޮކަންމަތީގައި ދެމި ތިބުމަށް، ކެއިން ބުއިމާއި، ކަސްރަތުކުރުމުގެ އިތުރުން އިޖުތިމާއީ ގުޅުންތައް ބަދަހިކުރުމާއި ނަފްސާނީ ދުޅަހެޔޮކަމަށް ސަމާލުކަން ދީގެން ކުރެވޭނެ އެކި ކަންކަން ޤަވައިދުން ކުރުމަކީ ވަރަށް މުހިންމުކަމެއް، އަދި އާއިލާތަކުގެ ތެރޭގައި ތިބި ޢުމުރުން ދުވަސްވީ މީހުންގެ ސިއްޙަތަށް ޚާއްސަ ސަމާލުކަމެއް ދީ، އެމީހުންގެ ދުޅަހެޔޮކަން ކަށަވަރުކުރުމަށް އާއިލާތަކުގެ ތެރެއިން އެ ފަރާތްތަކަށް ލޯތްބާ އަޅާލުމާ އޯގާތެރިކަން އަބަދުމެ ދޭން ޖެހޭ” ވަޒީރު ޢާއިޝާ ޝިހާމް ވިދާޅުވިއެވެ.

ވަޒީރު ޢާއިޝާވަނީ ދޮށީޢުމުރުގެ އާބާދީއަކީ ދުޅަހެޔޮ އުފާވެރި، ކަށަވަރުކުރުމުގެ ވިސްނުންފުޅުގައި، އަދި ދޮށީ ޢުމުރުގެ މީހުންގެ އަގު ވަޒަންކުރުމާއި، އެމީހުންގެ ހުނަރުތައް ގެއްލުނަ ނުދިނުމާއެކު، އުފާވެރި މާހައުލެއްގައި އެމީހުންގެ ތަޖުރިބާތަކާއި ވާހަކަތައް ހިއްސާކުރެވޭނެ ފަހި ފުރުސަތުތައް ހޯދައިދިނުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ގެންގުޅުއްވާ ތަޞައްވުރުގެ މައްޗަށް ޤާއިމްކޮށްދެއްވެވި އިސްރަށްވެހިންގެ ނާދީގެ މަސައްކަތް ފާހަގަކުރައްވައި އެމަނިކުފާނަށް ޝުކުރުއަދާކުރައްވައިފައެވެ.

އަދި ރައީސް މުޢިއްޒުގެ ތަޞައްވުރާއި އެއްގޮތަށް މުޅި ރާއްޖޭގައި އެފަދަ މަރުކަޒުތައް ޤާއިމް ކުރައްވާނެ ކަމަށް އެކަމަނާ ވިދާޅުވިއެވެ. 

“އަޅުގަނޑުމެންގެ އުންމީދަކީ އިސްރަށްވެހިންގެ ނާދީތަކުގެ ތެރެއިންނާއި، އެ ނޫން ވެސް އެކި ޕްރޮގްރާމުތަކުގެ ތެރެއިން އިސްރަށްވެހިންނަށް ޚާއްސަކޮށްގެން ކުރެވޭ މަސައްކަތްތަކުގެ ތެރެއިން އިސްރަށްވެހިންގެ ޖިސްމާނީ، ނަފްސާނީ އަދި އިޖުތިމާއީ ދުޅަހެޔޮކަމަށް، ރަނގަޅު ނަތީޖާތައް ފެނިގެން ދިއުން” ވަޒީރު ޢާއިޝާ ޝިހާމް ވިދާޅުވެފައިވެއެވެ.