ދުނިޔެ
ބަލާޠާ ރެފިޔުޖީ ކޭމްޕްގައި ތިބި މެޑިކަލް އޮފިސަރުންނަށް އަމާޒުކޮށް އިޒްރާއިލުން ހަމަލާދީފި!

މީގެކުރިން އިޒްރާއިލުން ރަފާޙް އަށް ދިން ހަމަލާއެއްގައި ޝަހީދުވި މެޑިކަލް އޮފިސަރެއްގެ ހަށިގަނޑު އުފުލަނީ. ފޮޓޯ:އޭއެފްޕީއޭ
ޣައްޒާގެ ބަލާޠާ ރެފިޔުޖީ ކޭމްޕްގައި މަސައްކަތް ކުރާ މެޑިކަލް އޮފިސަރުންނަށް ގަސްދުގައި އިޒްރާއިލް ސިފައިން ހަމަލާދީފައިވާ ކަމަށް އަލްޖަޒިރާގައި ރިޕޯޓްކޮށްފިއެވެ.
ފަލަސްޠީނުގެ ރެޑްކްރެސެންޓާއި ހަވާލާދީ އަލްޖަޒީރާގައި ބުނެފައިވަނީ އިޒްރާއިލުން އަރައިގަނެފައިވާ ފަލަސްޠީނުގެ ހުޅަނގު އައްސޭރީގެ ބަލާޠާ ރެފިޔުޖީ ކޭމްޕްގައި ހަރަކާތްތެރިވަމުންދިޔަ ތިން މެޑިކަލް އޮފިސަރަކަށް އަމާޒުކޮށް ގަސްދުގައި ހަމަލާދީފައިވާކަމަށެވެ.
އަދި މިހަމަލާތައް އިޒްރާއިލް ސިފައިން ދީފައިވަނީ އޭގެ ކުރިން އެކޭމްޕަށް ދިން ހަމަލާތަކުގެ ސަބަބުން ޒަޚަމްވި މީހުން ފަރުވާއަށް ގެންދިޔުމަށް މަސައްކަތް ކުރަމުންދަނިކޮށް ކަމަށްވެސް ވަނީ ބުނެފައެވެ.
މީގެއިތުރުން ފަލަސްޠީނުގެ ރެޑްކްރެސެންޓުން ބުނެފައިވަނީ އަނިޔާލިބިފައިވާ މީހުން އިތުރުފަރުވާއަށް ގެންދިޔުމަށް މަސައްކަތްކުރަމުންދާ އެމްބިއުލާންސްތަކަށް އިޒްރާއިލް ސިފައިން ހުރަސްއަޅަމުންދާކަމަށެވެ.
އަދި މިކަމުގެ ސަބަބުން ހަމަލާތަކުގައި ޒަޚަމްވި ރެޑްކްރެސެންޓްގެ މެޑިކަލް އޮފިސަރުންވެސް އަދި ޢާންމުންވެސް އިތުރު ފަރުވާއަށް ގެންދިޔުން މެދުކެނޑިފައިވާ ކަމަށެވެ.
އޮކްޓޫބަރު 7 2023 ގައި އިޒްރާއިލުން ފަލަސްޠީނަށް ދެމުންދާ ހަމަލާތަކުގެ ސަބަބުން މިހާތަނަށް ޝަހީދުވެފައިވާ މީހުންގެ ޢަދަދު ވަނީ 41،615 އަށް އަރައިފައެވެ. އަދި އެކިވަރުގެ ޒަޚަމްތައް ލިބިފައިވާ މީހުންގެ ޢަދަދު 96،359 އަކަށް ވަނީ އަރައިފައެވެ.