އިންޑިޔާގެ 48 އުފެއްދުމަކަށް ސަމާލުވުމަށް އެމްއެފްޑީއޭ އިން އިލްތިމާސްކޮށްފި!

އިންޑިޔާގެ އެކި ކުންފުނިތަކުން އުފައްދާފައިވާ 48 ޕްރޮޑަކްޓަކުން ކޮލިޓީގެ ގިނަ މައްސަލަތަކެއް ފާހަގަކުރެވިފައިވާތީ ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ އިން އިލްތިމާސްކޮށްފިއެވެ. 

އެމްއެފްޑީއޭއިން މިއަދު އާއްމުކުރި އިޢުލާނެއްގައި ބުނެފައިވަނީ ކުޑަކުދިންނަށް އާއްމުކޮށް ދެމުން އަންނަ ބޭހެއްކަމަށްވާ ޕެރެސެޓްމޯލް ހިމެނޭހެން އިންޑިޔާއަށް ނިސްބަތްވާ ބައެއް ކުންފުނިތަކުން އުފައްދާ 48 ބޭހަކަށް ސަމާލުވުމަށް އެދިފައެވެ.

https://twitter.com/MFDA_mv/status/1841073233547968538

އެމްއެފްޑީއޭއިން ބުނީ، އިންޑިޔާގެ އެކި ކުންފުނިތަކުން އުފައްދާފައިވާ ބައެއް ބޭސްތަކުގައި ކޮލިޓީގެ މައްސަލަަތައް ފާހަގަކުރެވިފައިވާތީ، އިންޑިޔާގެ ބޭސް ރެގިއުލޭޓްކުރާ މައި އިދާރާ CDSCO އިން ސަމާލުކަމަށް ގެނެސްފައިވާކަމަށެވެ.

އެމްއެފްޑީއޭއިން ބުނީ އިންޑިޔާގެ ކަމާބެހޭ އިދާރާގެ ސަމާލުކަމަށް އެކަން އައުމާ ގުޅިގެން ރާއްޖޭގެ ބާޒާރުގައި އެ ބޭސްތައް ހުރިތޯ ބެލުމަށް ފާމަސީތައް ބަލާފައިވާކަމަށެވެ.

މިހާތަނަށް ބެލި ބެލުމުން އެ ލިސްޓްގެ 44 ވަނައިގައިވާ ބޭހަކީ އެމްއެފްޑީއޭގެ އެޕްރޫވްޑް ލިސްޓްގައި 2017 ވަނަ އަހަރު ހިމަނާފައިވާ ބޭހެއް ނަމަވެސް، 2018 ވަނަ އަހަރުން ފެށިގެން މި ބޭހުގެ އެއްވެސް ބެޗެއް ރާއްޖެ އެތެރެކޮށްފައި ނުވާކަން ޔަޤީން ކުރެވިފައިވާކަމަށް އެމްއެފްޑިއޭއިން ބުންޏެވެ.

އެއޮތޯރިޓީން ބުނީ CDSCO ގެ ލިސްޓްގައިވާ އެއްވެސް ބޭހެއް ރާއްޖެއަށް އިމްޕޯޓްކޮށްފައި ނުވާކަން ޔަޤީންކުރެވިފައިވާކަމަށެވެ.

https://twitter.com/MFDA_mv/status/1841073264309010521

ނަމަވެސް އިންޑިޔާއަކީ ވަރަށް ގިނަ ދިވެހިން ބޭސްފަރުވާއަށް ގޮސް އުޅޭ ޤައުމެއްކަމުން ބައެއް ފަހަރަށް އަމިއްލައަށް ބޭސް ގަނެ، އެތެރެކުރާތީވެ، އެކަމަށް ސަމާލުވުމަށް އެމްއެފްޑީއޭއިން ވަނީ އިލްތިމާސްކޮށްފައިވެއެވެ.

އަދި މިކަމަށް ރައްކާތެރިވުމުގެ ގޮތުން ރާއްޖެއަށް ބޭސް އިމްޕޯޓްކުރާ ޕޯޓްތަކުގެ އިންސްޕެކްޝަން އިތުރަށް ވަރުގަދަކޮށް، އެފަދަ ބޭސްތައް އެތެރެވިޔަ ނުދިނުމަށް ކުރަންޖެހޭ މަސައްކަތްތައް ކުރަމުންގެންދާނެކަމުގެ ޔަޤީންކަން އަރުވާކަމަށްވެސް އެމްއެފްޑީއޭއިން ބުންޏެވެ.