ކުދިންގެ ޙަސަބާއި ނަސަބަށް ބެލުމެއްނެތި، ކޮންމެ ކުއްޖަކާ ހިސާބަށް ތަޢުލީމުގެ ފުރުޞަތު ވާސިލުވާން ބޭނުން: މެޑަމް ސާޖިދ

ކުދިންގެ ޙަސަބާއި ނަސަބަށް ބެލުމެއްނެތި، ހުރިހާކުދިން ޝާމިލުވާގޮތަށް ކޮންމެ ކުއްޖަކާ ހިސާބަށް ތަޢުލީމުގެ ފުރުޞަތު ވާސިލުވާން ބޭނުންފުޅުވާކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

މެޑަމް ސާޖިދާ މިހެން ވިދާޅުވީ “އިންޓަރނޭޝަނަލް ޓީޗަރސް ކޮންފަރެންސް" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. 

މިރަސްމިއްޔާތު ބާއްވައިފައިވަނީ މިއަދު ހެނދުނު ސެންޓަރ ފޮރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ) ގައެވެ. 

"އެޑިއުކޭޓް، އެމްޕަވަރ، އެލެވޭޓް؛ އިކުއިޓަބަލް އެޑިއުކޭޝަން ފޮރ ޓުވެންޓީ ފަސްޓް ސެންޗަރީ އެޑިއުކޭޝަން އެކްސަލަންސް،" މި ޝިޢާރުގެ ދަށުން ކުރިއަށް ގެންދާ މި ކޮންފަރެންސަކީ މުޅި ރާއްޖޭގެ އެކި ސަރަޙައްދުތަކުން އުނގަންނައިދޭ ފަރާތްތަކާއި ސިޔާސަތު ކަނޑައަޅާ ފަރާތްތަކުގެ އިތުރުން ކަމާ ގުޅުންހުރި ބޭފުޅުން އެއްތަނަކުން ބައްދަލުވެ ފުޅާދާއިރާއެއްގައި މަޝްވަރާކުރެވޭނެ ބައްދަލުވުމެކެވެ.

މެޑަމް ސާޖިދާ ވިދާޅުވީ ހަމަހަމަ ފުރުޞަތު ފަހިކޮށްދީ، ކޮންމެ ކުއްޖަކުމެ ތަޢުލީމުގައި ޝާމިލުވާކަން ޔަޤީންކުރުމަކީ އަބަދުވެސް ދިވެހިރާއްޖޭގެ ތަޢުލީމު ކުރިއެރުވުމުގައި އިސްކަންދެމުންއައި ގޮތް ކަމުގައެވެ.

އެ ކަމަނާގެ ވާހަކަފުޅުގައި، މުދައްރިސުންގެ ދުޅަހެޔޮކަމަށް އަމާޒުކޮށްގެން ތަޢުލީމީ ދާއިރާ ކުރިއެރުވުމަށް ސަރުކާރުން ވެފައިވާ ވަޢުދުތަކުގެ މައްޗަށްވެސް އަލިއަޅުވާލެއްވިއެވެ. 

އެގޮތުން ސްކޫލްގައި ހޭދަކުރަންޖެހޭ ވަގުތު ވަކިވަރެއްގައި ހިފެހެއްޓުމާއި ކިޔަވައިދިނުމުގައި ޙަރަކާތްތެރިވާ ފަންނީ ބޭފުޅުންގެ އިދާރީ މަސައްކަތްތައް މަދުކޮށް، އުނގަންނައިދިނުމުގެ ކަންކަމަށް އިތުރަށް ސަމާލުކަން ދިނުމަށް ވަގުތު ހުސްކޮށްދިނުންފަދަ ކަންކަން އެކަމަނާގެ ވާހަކަފުޅުގައި ފާހަގަކުރެއްވިއެވެ.

 މީގެއިރުތުން، މެޑަމް ސާޖިދާގެ ވާހަކަފުޅުގައި، މުދައްރިސުންނަށް ފަންނީ ތަރައްޤީގެ ފުރުސަތުތައް ފަހިކޮށްދީ، މަސައްކަތު ބައްދަލުވުންތައް ކުރިޔަށްގެންގޮސް، ތާޒާކުރުމުގެ ޕްރޮގްރާމުތައް ރާވާ ހިންގާ، ނަފްސާނީ ދުޅަހެޔޮކަމަށް އެހީތެރިކަން ފޯރުކޮށްދިނުމުގެ މުހިންމުކަންވެސް ފާހަގަކުރެއްވިއެވެ.

ދިވެހިރާއްޖޭގެ ތަޢުލީމީ ނިޒާމުގައި ހުރި ދަތިތަކާއި ހުރަސްތައް ފާހަގަކުރައްވައި، ރާއްޖޭގެ ރަށްތައް ވަކިވަކިން ހުރުމުގެ ސަބަބުން ޚާއްޞަގޮތެއްގައި ރަށްފުށުގެ ތަޢުލީމީ ނިޒާމު ހަރުދަނާކުރުމުގައި ހުރި ގޮންޖެހުންތައް ނައްތާލުމަށް، އެކުގައި މަސައްކަތްކޮށް، ބިނާކުރަނިވި ޙައްލުތައް ހޯދައި، ތަޢުލީމީ ވަސީލަތްތަކާއި، ގޮތްތަކާއި، ފުރުޞަތުތައް އިތުރުކުރުމުގައި ޓެކްނޮލޮޖީގެ ދައުރު އެ ކަމަނާގެ ވާހަކަފުޅުަގައި ފާހަގަކުރެއްވިއެވެ.

މެޑަމް ސާޖިދާގެ  ވާހަކަފުޅުގައި، ތަޢުލީމީ ނިޒާމު ހަރުދަނާކުރުމަށް، މުދައްރިސުންގެ ދައުރު އަދާކުރުމުގެ އިތުރުން ރަށްރަށުގައި ކިޔަވައިދޭ ޓީޗަރުން، އެ މުޖުތަމަޢުތަކުގެ މުރުޝިދުންނާއި ވެރީންގެ ގޮތުގައި ޙަރަކާތްތެރިވާކަން އުފަލާއެކު ފާހަގަކުރެއްވިއެވެ.

މިއަދު ފެށިގެން ކުރިއަށް ދާ މި ކޮންފަރެންސްއަކީ 7 ވަނަ  "އިންޓަރނޭޝަނަލް ޓީޗަރސް ކޮންފަރެންސް" އެވެ.