ދ. އަތޮޅުގެ ރައްޔިތުން ދަތުރުދިޔުމަށް ރައީސުލްޖުމްހޫރިއްޔާ ހަމަޖައްސަވައިދެއްވި އެ އަތޮޅު އުއްދޫ މިމަހު ހުޅުވަނީ

 ދ. އަތޮޅުގެ ރައްޔިތުން ދަތުރުދިޔުމަށް ރައީސުލްޖުމްހޫރިއްޔާ ހަމަޖައްސަވައިދެއްވި އެ އަތޮޅު އުއްދޫ މިމަހު ހުޅުވައިލުމަށް ހަމަޖެހިފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، އިއްޔެގެ ވަގުތެއްގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ މުވައްޒަފުންނާއެކު ބޭއްވި ބައްދަލުވުމެއްގައެވެ.

ވަޒީރު ވިދާޅުވީ، ދ. އަތޮޅުގެ ރައްޔިތުން ދަތުރުދިޔުމަށް ހަމަޖައްސާފައިވާ އުއްދޫ މި ހިނގާ އޭޕްރީލް މަހުގެ 15 ވަނަ ދުވަހު ހުޅުވައިލުމަށް ތައްޔާރުވަމުންދާ ކަމަށެވެ. އެގޮތުން، އުއްދޫ އާންމުންނަށް ހުޅުވާލާނީ، މި ވަގުތު އެރަށުގައި ފޯރުކޮށްދެވެން ހުރި ޚިދުމަތްތައް އެރަށުގައި ހަމަޖައްސަވައިދެއްވުމަށް ފަހުކަމަށް ވަޒީރު ވަނީ ވިދާޅުވެފައެވެ. ހަމަ އެހެންމެ، އުއްދޫ ހުޅުވާލާއިރު ޚިދުމަތްތައް އެންމެ ފުރިހަމައަށް ލިބެން ނެތް ނަމަވެސް ކައިރި ތާރީޚެއްގައި އެ ވުޒާރާގެ ރެކްރިއޭޝަން ކުލަބާ އެރަށް ޙަވާލުކުރެވޭނެކަމަށް ވަޒީރު ވިދާޅުވިއެވެ.

މީގެ އިތުރުން ވަޒީރު ވިދާޅުވީ، އެ ވުޒާރާގެ ރެކްރިއޭޝަން ކުލަބާ އެރަށް ހަވާލުކުރެއްވުމަށްފަހު، ރަށުގެ ކޮންސެޕްޓް ޕްލޭނެއް އެކުލަވައިލުމަށް ހަމަޖެހިފައިވާ ކަމަށެވެ. ހަމަ އެހެންމެ، އުއްދޫއަށް ދަތުރުދާ ފަރާތްތަކަށް އެންމެ އެކަށޭނަ ޚިދުމަތްތައް ޤާއިމްކުރުމުގެ މަސައްކަތްތައް ހަލުވި ދުވެލީގައި ފެށިގެން ދާނެކަމަށް ވަޒީރުގެ ވާހަކައިގައި ވަނީ ފާހަގަކުރައްވާފައެވެ.

ދ. އުއްދޫ އަކީ އެއަތޮޅުގެ ރައްޔިތުން ދަތުރުދާ ރަށެއްގެ ގޮތުގައި ހަމަޖައްސަވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި އަހަރުތެރޭ ކުރެއްވި ރަސްމީ ދަތުރުފުޅެއްގައި، އެ އަތޮޅު މީދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. ދ. އުއްދޫއަކީ މީގެ ކުރިން އަމިއްލަ ފަރާތަކުން ވިޔަފާރީގެ  އުސޫލުން ބޭނުންކުރައްވައި، އެއްބަސްވުމުގެ މުއްދަތު ހަމަވުމުން ސަރުކާރަށް އަނބުރާ ލިބިފައިވާ ރަށެކެވެ.

މި ވަގުތު އުއްދޫ ބެލެހެއްޓުމުގެ މަސައްކަތް ކުރަމުން އަންނަނީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ މުވައްޒަފުންނެވެ.