ޤައުމު ކުރިއަރުވަން ބޭނުންވާނަމަ، އެންމެހާ ފަރާތްތަކުން، ޓީޗަރުންނަށް ޤަދަރު ދޭންޖެހޭ: ވަޒީރު ޝަފީޢު

ޤައުމު ކުރިއަރުވަން ބޭނުންވާނަމަ، ދަރިވަރުންނާ ބެލެނިވެރިން އަދި އެންމެހާ ފަރާތްތަކުން ޓީޗަރުންނަށް ޤަދަރު ދޭންޖެހޭ ކަމަށް ތަޢުލީމީ ވަޒީރު އިސްމާޢީލް ޝަފީޢު ވިދާޅުވެއްޖެއެވެ.

ވަޒީރު ޝަފީޢު މިހެން ވިދާޅުވީ މުދައްރިސުންގެ ބައިނަލްއަޤްވާމީ 7 ވަނަ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. 

ވަޒީރުގެ ވާހަކަފުޅުގައި ވިދާޅުވީ ތަޢުލީމީ ދާއިރާގެ ތެރޭގައި ފާހަގަކުރެވޭ އެންމެ ބޮޑު އެއް ދަތިކަމަކީ މުދައްރިސުން މަދުވުން ކަމަށެވެ. އަދި އެއީ ބޮޑު ކަންބޮޑުވުމެއް ކަމަށާއި އަދިވެސް ޓީޗަރުން އިތުރުކުރަންޖެހޭ ކަމަށް އެމަނިކުފާނު ވިދާޅުވިއެވެ.

ވަޒީރު ޝަފީޢު ވިދާޅުވީ އިންޓަނޭޝަނަލް ރިސާޗްތަކުން ވަރަށް ސާފު ކޮށް އެެގެން އޮތް ކަމަކީ އެންމެ ރަނގަޅު ތަޢުލީމީ ސިސްޓަމެއް އޮތް ޤައުމު ތަކަކީ އެޤައުމެއްގެ ޓީޗަރުންނަށް ކުރާ ޤަދަރާއި އިޚްތިރާމް އެންމެ ރަނގަޅު ޤައުމު ތައްކަމަށެވެ.

އެހެންކަމުން، ޤައުމު ކުރިއަރުވަން ބޭނުންވާނަމަ، ބެލެނިވެރިންނާއި ދަރިވަރުންނާއި، އަދި އެންމެހާ ފަރާތްތަކުން، ޓީޗަރުންނަށް ދޭންޖެހޭ ޤަދަރާއި ޝަރަފާއި އިޙްތިރާމާއި ލޯބި ޓީޗަރުންނަށް ދޭންޖެހޭ ކަމަށް ވަޒީރު ޝަފީޢު ވިދާޅުވިއެވެ.

އަދި އެކަން ކުރެވިއްޖެ ނަމަ، އިރާދަކުރެއްވިއްޔާ ދިވެހިރާއްޖެ ދާނީ އުޖާލާ މަގުގައި ކަމަށާއި، ޤައުމު ދާނީ ކާމިޔާބު ހާސިލް ކުރަމުން އަދި ޤައުމީ ތަރައްޤީގެ ލަނޑުދަނޑިތައް ހާސިލް ކުރަމުން ކަމަށްވެސް ވަޒީރު ވިދާޅުވިއެވެ.

"އެޑިއުކޭޓް، އެމްޕަވާ، އެލިވޭޓް: އިކުއަޓަބަލް އެޑިއުކޭޝަން ފޯ ޓްވެންޓީ ފަސްޓް ސެންޗަރީ އެޑިއުކޭޝަން އެކްސެލެންސް"ގެ ނަމުގައި މިއަދު ފެށުނު މުދައްރިސުންގެ ކޮންފަރެންސްގައި އުނގަންނައިދޭ ފަރާތްތަކާއި ސިޔާސަތުތައް ކަނޑައަޅާ ފަރާތްތަކާއި ސްޓޭކްހޯލްޑަރުން ވަނީ ރާއްޖޭގެ އެކި ކަންކޮޅުތަކުން ބައިވެރިވެފައެވެ.

މި ކޮންފަރެންސަކީ ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ)އިން ކޮންމެ ދެ އަހަރުން އެއް އަހަރު ބާއްވަމުން އަންނަ ކޮންފަރެންސެކެވެ. އެގޮތުން، މިއަދު ފެށި ކޮންފަރެންސް މާދަމާގެ ނިޔަލަށް ކުރިއަށް ދާނެއެވެ.

މި ކޮންފަރެންސްގައި 250 ބައިވެރިން ބައިވެރިވެފައިވެއެވެ. އަދި، މި ކޮންފަރެންސްއަށް 60 ރިސާޗް ޕޭޕަރާއި، ހަތަރު ކޭސް ސްޓަޑީ ހުށަހަޅާފައިވެއެވެ. މީގެ އިތުރުން، ކޮންފަރެންސްގައި ދެ ކީނޯޓް އަދި ދެ ޕެނަލް ޑިސްކަޝަން ކުރިއަށްދާނެ ކަމަށް ތަޢުލީމީ ވުޒާރާއިން ބުނެފައިވެއެވެ.