ޚަބަރު
ފާއިތުވި ސަރުކާރު ތަކުން އިތުރަށް ޗާޕްކުރި ފައިސާތައް މާކެޓުން ނަގަނީ!
މޯލްޑިވްސް މަނިޓަރީ އޮތޯރިޓީ. ފޮޓޯ:އިންޓަރނެޓް
ހުލާސާ
ފާއިތުވި ސަރުކާރު ތަކުން އިތުރަށް ޗާޕްކުރި ފައިސާތައް މާކެޓުން ނެގުމަށް މޯލްޑިވްސް މަނިޓަރީ އޮޓޯރިޓީ އިން ނިންމައިފިއެވެ.
އެމްއެމްއޭގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ގަވަރުނަރު އަޙްމަދު މުނައްވަރު ވިދާޅުވީ، ބޭންކިން ނިޒާމުގައި އިތުރުވެފައިވާ ދިވެހިރުފިޔާ މަދުކުރުމަށް އޯޕަން މާކެޓް އޮޕަރޭޝަނެއް ފެއްޓެވުމަށް ނިންމާފައިވާކަމަށެވެ.
މި އޮޕަރޭޝަން ފަށާނީ މިއަހަރުގެ ނޮވެމްބަރުމަހުގެ ތެރޭގައި ކަމަށް ގަވަރުނަރު ވަނީ ވިދާޅުވެފައެވެ.
ގަވަރުނަރު މުނައްވަރު ވިދާޅުވީ ޗާޕްކުރުމުގެ ސަބަބުން އިޤްތިޞާދުގައި ދައުރުވަމުންދާ "އެކްސެސް މަނީ" ނުވަތަ އިޤްތިޞާދުގެ ތެރޭގައި ދައުރުވާންޖެހޭ ފައިސާގެ އިތުރަށް ހުރިކަމަށް ފާހަގަކުރެވޭ ފައިސާތައް ނެގުމަށް އެމްއެމްއޭގެ ބޯޑުންވެސް ރުހުންދީފައިވާކަމަަށެވެ.
މިކަމުގައި ސަރުކާރަށް ދަތިތަކެއް ހުންނާނޭކަން ފާހަގަކުރައްވަމުން ގަވަރުނަރު ވިދާޅުވީ، މާކެޓް އޮޕަރޭޝަނުގެ ސަބަބުން ކޭޝްފްލޯ ހަމަޖެއްސުމަށް ދަތިތަކެއް ކުރިމަތިވެދާނޭ ކަމަށްވެސް ގަވަރުނަރު ވިދާޅުވިއެވެ.
މާކެޓް އޮޕަރޭޝަން އެކިފަހަރުމަތިން ކުރިއަށްގެންދިއުމަށް ނިންމާފައިވާއިރު، ހަ ބިލިއަން ނުވަތަ ފަސް ބިލިއަން ރުފިޔާ ނަގާނޭކަމަށް ގަވަރުނަރު ވަނީ ފާހަގަކުރައްވާފައެވެ.
މިދިޔަ ސަރުކާރުގެ ވެރިކަމުގައި ސަރުކާރުގެ ހަރަދުތައް ހަމަޖެއްސުމަށް 8 ބިލިއަނަށްވުރެ ގިނަ ރުފިޔާ ޗާޕްކޮށްފައިވާކަމަށް މި ސަރުކާރުން ބުނެފައިވެއެވެ.
