ބޭންކިންގ ނިޒާމުގެ ތެރޭގައި ޑޮލަރު ހިފެހެއްޓިފައި ހުރުމަކީ އިޤްތިޞާދަށް މުހިންމުކަމެއް: މުއްޠަލިބް

ބޭންކިންގ ނިޒާމުގެ ތެރޭގައި ޑޮލަރު ހިފެހެއްޓިފައި ހުރުމަކީ އިޤްތިޞާދަށް މުހިންމު ކަމެއް ކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޢަބްދުﷲ މުއްޠަލިބް ވިދާޅުވެއްޖެއެވެ. 

މިނިސްޓަރ މުއްޠަލިބް މިހެން ވިދާޅުވީ ރާއްޖެއަށް ވަންނަ ބޭރު ފައިސާއާ ބެހޭ ޤަވާއިދަކާއި ފައިސާ މާރުކުރުމުގެ ވިޔަފާރިއާ ބެހޭ ޤަވާއިދެއް އެމްއެމްއޭއިން އެކުލަވާލުމާ ގުޅިގެން އެކްސް ގައި ކުރެއްވި ޕޯސްޓެއްގައެވެ.

މިނިސްޓަރ މުއްޠަލިބު ވިދާޅުވީ، މިއީ ކުރީގެ ހުރިހާ ސަރުކާރުތަކަކުންވެސް ކުރުމަށް ބޭނުންވެފައި އޮތް ކަމެއް ކަމަށެެވެ. ނަމަވެސް އެކަން ކުރާނެ ސިޔާސީ ހިތްވަރު ނެތުމުގެ ސަބަބުން ނުނިންމި ނިންމުމެއް ކަމަށް މުއްޠަލިބް ވިދާޅުވެފައިވެއެވެ. 

އަދި ރާއްޖޭގެ ބޭންކިން ނިޒާމުގައި ޑޮލަރު ހިފެހެއްޓުމަކީ އިމްޕޯޓްތަކަށް ފައިސާ ދެއްކުމަށާއި، ބައިނަލްއަޤުވާމީ ދަރަނިތައް އަދާކުރުމަށާއި، ކާޑު ސެޓްލްމަންޓްތަކަށް ފައިސާ ދެއްކުމަށާއި، ދިވެހި ރުފިޔާގެ އަގު ސްޓެބިލައިޒް ކުރުމަށާއި، ޑޮލަރުގެ ކަޅު ބާޒާރު ނައްތާލުމަށް ކޮންމެހެން ބޭނުން ކަމެއް ކަމަށް އެމަނިކުފާނު ވަނީ ވިދާޅުވިއެވެ.

https://twitter.com/muththo/status/1841164851277938724

މީގެ އިތުރުން، ރަނގަޅު ޑޮލަރު ރިޒާވެއް އޮތުމަކީ އިޤްތިޞާދީ ހަރުދަނާކަމާއި އަގުތައް ކޮންޓްރޯލް ކުރުމަށް މުހިންމު ކަމެއް ކަމަށާއި، މިއީ އިޤްތިޞާދީ ކުރިއެރުމާއި މާލީ ހަރުދަނާކަމަށް ކޮންމެހެން ބޭނުން ކަމެއް ކަމަށްވެސް މިނިސްޓަރ މުއްޠަލިބު ފާހަގަކުރެއްވިއެވެ.

އަދި ޓޫރިޒަމް ހިމެނޭ ގޮތަށް ހުރިހާ އިޤްތިޞާދީ ދާއިރާތަކެއް ކުރިއެރުވުމަށްޓަކައި ޤައުމުގެ އިޤްތިޞާދު ހަރުދަނާވެފައި އޮތުން މުހިންމު ކަމަށްވެސް މިނިސްޓަރ މުއްޠަލިބް ވިދާޅުވިއެވެ.

މިނިސްޓަރ މުއްޠަލިބު އިތުރަށް ވިދާޅުވީ، ފާއިތުވި އަހަރުތަކުގައި ރާއްޖެއަށް މިކަން ރެގިއުލޭޓް ކުރަން ޖެހިފައިވާކަން ވަރަށް ސާފުކޮށް ފެންނަން އޮތް ކަމަށެވެ.

މަނީޗޭންޖިން ވިޔަފާރިއާ ބެހޭ ޤަވައިދުގެ ދަށުން އެމްއެމްއޭއިން ވަނީ ރާއްޖޭގައި ޓޫރިޒަމް ވިޔަފާރިކުރާ ތަންތަނަށް، އެތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައެވެ. އެގޮތުން ކެޓަގަރީ އޭގައި ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭ ގޮތަށް ވަނީ ހަމަޖައްސާފައެވެ.