ޑިވެލޮޕްމަންޓް ބޭންކު އުފެއްދުމަށް ބޭނުންވާ ލައިސަންސް ދިނުމަށް އެމްއެމްއޭ ގެ ބޯޑުން ފާސްކޮށްފި: މުނައްވަރު

މޯލްޑިވްސް ޑިވެލޮޕްމަންޓް ބޭންކު، އުފެއްދުމަށް ބޭނުންވާ ލައިސަންސް ދިނުމަށް މޯލްޑިވްސް މަނިޓަރީ އޮތޯރިޓީ(އެމްއެމްއޭ)ގެ ބޯޑުން ފާސްކޮށްފި ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ

ރޭ ޤައުމީ ޓީވީގައި ވާހަކަފުޅު ދައްކަވަމުން ގަވަރުނަރު މުނައްވަރު ވިދާޅުވީ ޑިވެލޮޕްމެންޓް ބޭންކުގެ ލައިސަންސް ދިނުމަށް ބޭނުންވާ ދިރާސީ މަސައްކަތް ނިމި، އެމްއެމްއޭގެ ބޯޑުން ފާސްކޮށްފައިވާކަމަށެވެ. އެއާއެކު މި ހަފްތާ ތެރޭގައި ބޭންކް ލައިސަންސް ދެވި ވަރަށް އަވަހަށް މަސައްކަތް ފެށިގެންދާނެކަމަށް އުއްމީދު ކުރައްވާކަމަށް މުނައްވަރު ވިދާޅުވިއެވެ.

މުނައްވަރު ވިދާޅުވީ މިފަދަ މާލީ އިދާރާތައް ރާއްޖޭގެ ބޭންކިން ނިޒާމަށް ވަރަށް މުހިންމުކަމަށެވެ. އެގޮތުން މިވަގުތު ބޭންކިން ނިޒާމުގެ ތެރޭގައި ފަތުރުވެރިކަމުގެ ދާއިރާގެ ރިސޯޓުތައް ތަރައްޤީކުރުމަށް ފައިނޭންސް ކުރުމުގެ ޤާބިލީއްޔަތުކަން ނެތްކަން އޭނާ ފާހަގަކުރެއްވިއެވެ.

މީގެއިތުރުން ރާއްޖޭގެ ޑިވެލޮޕްމަންޓް ބޭންކުގެ އިތުރުން އިންޓަނޭޝަނަލް ފައިނޭންޝަލް ސެންޓަރ ޤާއިމްކުރަން ޖެހެނީވެސް މާލީ ނިޒާމުގެ ޤާބިލީއްޔަތުކަން އިތުރުކުރަންކަން ގަވަރުނަރު މުނައްވަރުގެ ވާހަކަފުޅުގައި ފާހަގަކުރެއްވިއެވެ. އޭގެ ސަބަބުން ބޭރު ޤައުމުތަކުން މިފަދަ މަޝްރޫޢުތަކަށް ފައިނޭންސް ހޯދުމުގެ ބަދަލުގައި ރާއްޖޭގެ ބޭންކިން ނިޒާމުގެ ތެރެއިން މި މަޝްރޫޢުތަކަށް ފައިނޭންސް ކުރެވި އޭގެ މަންފާ ލިބިގެންދާނެކަން އޭނާ ފާހަގަކުރެއްވިއެވެ.

ޑިވެލޮޕްމެންޓް ބޭންކުގެ ލައިސަންސް މި ހަފްތާތެރޭގައި ދޫކުރާއިރު، އެ ބޭންކުގެ އިމާރާތުގެ މަސައްކަތް މިހާރު ކުރިއަށް ދެއެވެ. މޯލްޑިވްސް ޑިވެލޮޕްމަންޓް ބޭންކް ޤާއިމުކުރަނީ ޗާންދަނީ މަގާއި އަމީރު އަޙްމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގެ ތިރީ ބުރީގައެވެ.