ހުޅުމާލެ ތިންވަނަ ފިޔަވަހީގެ ހުސްބިންތަކުގައި ހުރި ތަކެތި ނެގުމަށް އަންގައިފި!

ހުޅުމާލެ ތިންވަނަ ފިޔަވަހީގެ ހުސްބިންތަކުގައި ހުރި ތަކެތި ނެގުމަށް ހުޅުމާލެ ޑިވަލޮޕްމެންޓް ކޯޕަރޭޝަން (އެޗްޑީސީ) އިން އަނެއްކާވެސް އަންގައިފިއެވެ. 

އެޗްޑީސީ އިން މިކަމާގުޅިގެން ކުރި އިޢުލާނެއްގައި ބުނެފައިވަނީ، އެތަކެތި ނެގުމާއި ގުޅޭ ގޮތުން މީގެ ކުރިން ދެފަހަރު އިޢުލާނު ކުރި ނަމަވެސް، އެއިޢުލާނަށް ގިނަ ފަރާތްތަކުން އިޖާބަދީފައިނުވާ ކަމަށެވެ.

ހުޅުމާލޭގެ ތިން ވަނަ ފިޔަވަހީގެ ބިންތަކުގައި ޤަވާއިދާއި ޚިލާފަށް މުދާ ބަހައްޓައި، ބައެއް ފަރާތްތަކުން އަދިވެސް އެ ބިންތައް ބޭނުންކުރަމުންދާ ކަމަށް އެޗްޑީސީ އިން ބުނެފައިވެއެވެ.

އެހެންކަމުން އެޗްޑީސީން ވަނީ ހުޅުމާލޭގެ ތިން ވަނަ ފިޔަވަހީގައި ޤަވާއިދާއި ޚިލާފަށް ބަހައްޓާފައިވާ މުދަލާއި ތަކެތި އޮކްޓޫބަރު މަހުގެ 11 ވާ ހުކުރު ދުވަހުގެ ކުރިން ނެގުމަށް އަންގާފައެވެ.

އެ މުއްދަތުގެ ތެރޭގައި އެތަކެތި ނުނަގައިފި ނަމަ، އެއީ ވެރިފަރާތްތަކުން ބޭނުން ނެތިގެން ދޫކޮށްލާފައިވާ ތަކެތި ކަމަށް ބަލައި، އެފަދަ ތަކެއްޗާ މެދު އަމަލުކުރުމަށް ހަމަޖެހިފައިވާ ގޮތުގެ މަތިން އަމަލު ކުރެވޭނެ ކަމަށާއި، އެ މަސައްކަތުގެ ތެރެއިން މުދަލަށް ނުވަތަ ތަކެއްޗަށް ލިބިދާނެ ގެއްލުމަކަށް ޒިންމާނުވާނެ ކަމަށް އެޗްޑީސީ އިން ވަނީ ބުނެފައެވެ.