ސިޔާސީ ޕާޓީއެއްގެ ދަފުތަރުން ވަކިވާން އެދޭނަމަ އެކަމަށް ދެން އެދެންޖެހޭނީ އޮންލައިންކޮށް!

ސިޔާސީ ޕާޓީއެއްގެ ދަފުތަރުން ވަކިވާން އެދޭނަމަ އެކަމަށް ދެން އެދެންޖެހޭނީ އޮންލައިންކޮށް ކަމަށް އިލެކްޝަންސް ކޮމިޝަނުން ބުނެފިއެވެ. 

އިލެކްޝަންސް ކޮމިޝަނުން ބުނެފައިވަނީ އެކޮމިޝަނުން، ފޯރުކޮށްދޭ ޚިދުމަތްތައް ހަރުދަނާކޮށް، ޑިޖިޓަލް ކުރުމަށް ކުރެވޭ މަސައްކަތުގެ ތެރެއިން، އެކޮމިޝަނުން ބަލަހައްޓާ ސިޔާސީ ޕާޓީގެ މެންބަރުންގެ ދަފުތަރުން ވަކިވުމަށް އެދޭ އެދުން އޮންލައިންކޮށް ހުށަހެޅޭނެ ނިޒާމެއް ޤާއިމްކޮށްފައިވާ ކަމަށެވެ. 

 https://twitter.com/ElectionsMv/status/1841456061519450359

އެގޮތުން މިއަދުން ފެށިގެން، ސިޔާސީ ޕާޓީއަކުން ވަކިވުމަށް އެދޭނަމަ my.elections.gov.mv "މައި ޕޯޓަލް" މެދުވެރިކޮށް މި ޚިދުމަތް ފަސޭހަކަމާއެކު އާންމުނަށް ބޭނުންކުރެވޭނެ ކަމަށް އެކޮމިޝަނުން ބުނެފައިވެއެވެ. އަދި މިޕޯޓަލް މެދުވެރިކޮށް ހުށަހަޅާ ހުށަހެޅުމެއްގެ އަދާހަމަ ވަގުތުން ފެންނާނެހެން އެ ޕޯޓަލް ފަރުމާކުރެވިފައިވާ ކަމަށްވެސް އެކޮމިޝަނުން ވަނީ ބުނެފައެވެ.

"މައި ޕޯޓަލް" މެދުވެރިކޮށް މި ޚިދުމަތް ދޭން ފެށުމާއެކު، މީގެކުރިން ބޭނުންކުރަމުން އައި "ސިޔާސީ ޕާޓީގެ ދަފްތަރަށް ޝަކުވާ ހުށަހަޅާ ފޯމު" ބޭނުންކުރުން ހުއްޓާލައިފައިވާކަން އެކޮމިޝަނުން ވަނީ ޢާންމުކޮށް އިޢުލާނުކޮށްފައެވެ.

މި ޚިދުމަތްދިނުމަށް ހަމަޖައްސާފައިވަނީ މިހާރުވެސް ސަރުކާރުގެ އެކިއެކި ޚިދުމަތްތަކަށް ބޭނުންކުރާ، އީ-ފާސް މެދުވެރިކޮށްކަމަށާއި، ޕާޓީއަކުން ވަކިވާން އެދި ހުށަހަޅާއިރު އިތުރު ލިޔެކިއުމެއް ބޭނުމެއް ނުވާނެކަމަށްވެސް އީސީ އިން ބުނެފައިވެއެވެ.

އަދި މިކަމަކީ ރައްޔިތުންނަށް ލުއިފަސޭހަ، އަދި އިތުބާރުކުރެވޭނެ ނިޒާމަކަށް ވެގެންދާނެ ކަމަށްވެސް އީސީ އިން ވަނީ ބުނެފައެވެ.