މާލީ ބާރުވެރިކަން ހޯދުމަށް އިދިކޮޅު އެމްޑީޕީ އިން ވިޔަފާރީގެ ދާއިރާއަށް ނުކުންނަނީ!

މާލީ ބާރުވެރިކަން ހޯދުމަށް އިދިކޮޅު އެމްޑީޕީ އިން ވިޔަފާރީގެ ދާއިރާއަށް ނުކުތުމަށް އެޕާޓީގެ ޤައުމީ މަޖިލީހުން ރޭ ނިންމައިފިއެވެ.

އެމްޑީޕީގެ ޤައުމީ މަޖިލީހުގެބައްދަލުވުމެއް ރޭ ބާއްވާފައިވާއިރު އެބައްދަލުވުމަށް ޕާޓީގެ ލީޑަރޝިޕުން ހުށަހެޅި ގަރާރުގައި ވަނީ އިލެކްޝަންސް ކޮމިޝަނުން ޕާޓީތަކަށް ދޫކުރާ ފައިސާއަކީ ހަރުދަނާ ގޮތެއްގައ ިޕާޓީ ހިންގުމަށް އެކަށީގެންވާ އަދަދެއް ކަމަށް ނުވާތީ، ޤާނޫނުގެ ތެރެއިން ފަހިކޮށްދީފައިވާ ގޮތުގެ ދަށުން ވިޔަފާރިއެއް ފެށުމަށް ހުށަހެޅުމަށެވެ. 

އެމްޑީޕީގެ ޗެއާޕާސަން ފައްޔާޒް އިސްމާޢީލް ވިދާޅުވީ،  ޙަޤީޤަތުގައި ޕާޓީ ހަރުދަނާ ގޮތުގައި ކުރިއަރުވައި ގެންދިއުމަށްޓަކައި ވަރަށް ބައިވަރު ފައިސާ ބޭނުންވާ ކަމަށެވެ. އަދި ޕާޓީ އަށް 19 އަހަރު ވެގެންދިޔައިރު ޕާޓީ އަމިއްލަ ފައިމައްޗަށް ތެދުވުމަށްޓަކައި މާލީި ތަނަވަސްކަން ހޯދިފައި ނެތްކަމަށް ފައްޔާޒު ވިދާޅުވިއެވެ. 

އޭނާ ވިދާޅުވީ، ސިޔާސީ ޕާޓީތަކުން ވިޔަފާރިކުރުމަށް ސިޔާސީ ޕާޓީތަކާ ބެހޭ ޤާނޫނުން ޖާގަ ދީފައިވާ ކަމަށާއި އެފަދަ ވިޔަފާރިތައް ކުރުމަށް ޤާނޫނީ ނިޒާމެއް ހޯދޭނެ ކަމަށް ގަބޫލު ކުރައްވާ ކަމަށެވެ.

"އަޅުގަނޑު ޤަބޫލުކުރާ ގޮތުގައި ކުންފުނީގެ ޤާނޫނުން އެ ޖާގަ ލިބޭ، ސިޔާސީ ޕާޓީއަކަށް ކުންފުންޏެއް އުފެއްދުމަކަށް ހުރަހެއް ނެތް، އެކަމަކު ސަރުކާރުގައި ތިބި އެކަމާ ބެހޭ ބޭފުޅުން އެކަން ނުކޮށްދެއްވައިފި ނަމަ އެކަން ކުރެވޭނެ ގޮތެއް ނެތް،" ފައްޔާޒް ވިދާޅުވި އެވެ.

އޭނާ ވިދާޅުވީ ވަރަށް އަވަހަށް ރިއަލް އެސްޓޭޓް ވިޔަފާރިގެ ތެރެއަށް އެޕާޓީން ވަންނާނެ ކަމަށާއި، އެކަން ކުރެވޭނެ ގޮތެއް ހޯދަން ޖެހޭ ކަމަށެވެ.

އެކަމަކު، އެކަން ކުރެވޭނެ ގޮތްތައް ދެން ބާއްވާ ޤައުމީ މަޖިލިހުގެ ޖަލްސާއަކަށް ހުށަހަޅުއްވާނެ ކަމަށް ފައްޔާޒު ވިދާޅުވި އެވެ.

ރޭގެ ބައްދަލުވުމުގައި ވަނީ ސިޔާސީ ދާއިރާ އަށް މީހުން ބިނާ ކުރުމަށް އެކަޑެމީއެއް ފެށުމަށް ވެސް ގަރާރެއް ފާސްކޮށްފަ އެވެ.