ހުޅުމާލޭގައި ޕާކިންގ ބިލްޑިންގ ތަކެއް އެޅުމަށް އެޗްޑީސީ އާއި އެކު ސޮއިކޮށްފި!

ހުޅުމާލޭގައި ޕާކިންގ ބިލްޑިންތަކެއް އެޅުމަށް ހުޅުމާލޭ ޑިވަލޮޕްމެންޓް ކޯޕަރޭޝަނާއި އެކު ސޮއިކޮށްފިއެވެ. 

ދަތުރުފަތުރާ ބެހޭ ވުޒާރާއާއި އެޗްޑީސީއާ ދެމެދު އެއްބަސްވުމުގައި ސޮއިކުރެވިފައިވަނީ ކުރިއަށް އޮތް ދެ އަހަރުގެ ތެރޭގައި 15 ޕާކިން ބިލްޑިންގ އެޅުމަށެވެ.

މި އެއްބަސްވުމުގައި ސޮއިކުރެއްވީ ދަތުރުފަތުރާ ބެހޭ ވަޒީރު މުހައްމަދު އަމީން އަދި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދެވެ.

ޢުމަރު ޒާހިރު އޮފީސް ބިލްޑިންގައި ބޭއްވި ރަސްމިއްޔާތުގައި އަމީން ވިދާޅުވެފައިވަނީ އާ ސަރުކާރުން ވެރިކަމާ ހަވާލުވިއިރު މަގުތައް އޮތީ ބޮއްސުންލައިގެން ގޮސްފައި ކަމަށެވެ. ނަމަވެސް ހަރުދަނާ ބަދަލުތަކާ އެކު ވަރަށް ބޮޑެތި ހައްލުތަކެއް އައިސްފައިވާ ކަމަށާއި އެ ޕާކިން ބިލްޑިންތަކާ އެކު ބޮޑު ހައްލެއް އަންނާނެ ކަމަށް އަމީން ވިދާޅުވި އެވެ.

އޭނާ ވިދާޅުވި ގޮތުގައި ގަރާޖު ހުރި ކަމަށް ބަލައި، ރަޖިސްޓްރީކޮށްދީފައި ހުރި ގިނަ އަދަދެއްގެ ވެހިކަލް ޕާކުކޮށްފައި ހުރީ މަގުމަތީގަ އެވެ. ގެދޮރާއި އިމާރާތުގެ ދަތިކަމާ ހުރެ ގަރާޖެއް ނުލިބޭ މީހުންނަށް ވެސް، ގާނޫނުގެ ތެރެއިން ޕާކިން ބިލްޑިންގައި ވެހިކަލް ރަޖިސްޓްރީކުރެވޭނެ ކަމަށް ވަޒީރު އަމީން ވިދާޅުވި އެވެ.

އަމީން ވިދާޅުވީ ޕާކިންގ ބިލްޑިންގ ތައް އެޅުމާއިއެކު މި މައްސަލައަށް ވަރަށް ބޮޑު ހައްލެއް ލިބިގެންދާން ކަމަށް ޤަބޫލުކުރެވޭ ކަމަށެވެ. މި ޕާކިން ބިލްޑިންތަކަކީ ރަޖިސްޓްރީ ކުރެވޭ ގޮތަށް، އަދި އެ ބޭނުންކުރައްވާ ބޭފުޅުން ބޭނުންކޮށް ނިމުނީމަ ވެހިކަލް ގެންގޮސް ވައްދާނެ ގަރާޖެއް ގޮތުގައި ވެސް ބޭނުން ކުރެވޭނެ ތަނެއް ކަމަށް އަމީން ވިދާޅުވިއެވެ. އަދި އެތަންތަނަކީ މި ޒަމާނަށް ފެތޭ ގޮތައް ހެދޭނެ ތަންތަން ކަމަށާއި، މި ބިލްޑިންތައް އަޅާ ނިމޭއިރު ހުންނާނީ އޮޓޮމޭޝަންއާއެކީ އައިސްފައި ކަމަށާއި، އެކަމާއި އެކު އެބިލްޑިންގ ތައް ބޭނުންކުރާ ފަރާތްތަކަށް ޕާކް ކުރުމުގައި އުނދަގުލެއް ނުވާނެ ކަމަށްވެސް  އަމީން ވިދާޅުވި އެވެ.

ޕާކިން ބިލްޑިންތަކުގައި ޖުމްލަ 3،920 ކާރު ސްލޮޓު އަދި 3،426 ސައިކަލު ޕާކްކުރާނެ ޖާގަ ދޫކުރާނެ އެވެ. އޭގެ ތެރެއިން 90 ޕަސެންޓް ދޫކުރަން ނިންމާފައިވަނީ ބީލަމުގެ އުސޫލުންނެވެ. ބާކީ 10 ޕަސެންޓް ދޫކުރަނީ، ޕާކިން ބިލްޑިންތަކުގެ ގްރައުންޑް އަދި އެންމެ މަތީ ފްލޯގައި ހަދާ ކެފޭ/ ރެސްޓޯރެންޓު އަދި ކުޅިވަރު ހޯލުތަކަށް ދާ މީހުންނަށެވެ.

އެއްބަސްވުމުގައި ސޮއިކުރުމަށް ބޭއްވުމަށް ބޭއްވި ރަސްމިއްޔާތުގައި އެޗްޑީސީގެ މެނޭޖިން ޑިރެކްޓަރު، ފަޒުލް ވިދާޅުވީ އެ ސްލޮޓަށް ދޫކުރާ ލިޔުމުން ކާރު ރަޖިސްޓްރީކޮށްދޭނެ ކަމަށާއި ޕާކިން ސްލޮޓު ގަންނަ މީހުންނަށް މުޅި އުމުރަށް އެ ތަން ލިބޭނެ ކަމަށެވެ.

އެޗްޑީސީން ވަނީ ޕާކިން ބިލްޑިންތައް އަޅައިދޭނެ ބަޔަކު ހޯދަން މިދިޔަ މަހު އިޢުލާންކޮށްފަ އެވެ. އެކަމަށް ބޮޑު ތަރުހީބެއް ލިބިފައިވާ ކަމަށާއި މި އަހަރު ނިމުމުގެ ކުރިން، ފުރަތަމަ ފިޔަވަހީގައި ހިމެނޭ 7-8 ޕާކިން ބިލްޑިންގެ މަސައްކަތް ފަށާނެ ކަމަށް ފަޒުލް ވިދާޅުވި އެވެ.