ރާއްޖޭގައި ދިމާވާ ކުއްލި ޙާލަތުގައި ގުޅަން ޚާއްޞަ ވަކި ނަންބަރެއް ތަޢާރަފްކުރަނީ!

ރާއްޖޭގައި ދިމާވާ އެކިކަހަލަ ކުއްލި ޙާލަތްތަކުގައި ގުޅަން ޚާއްޞަ ވަކި ނަމްބަރެއް ތަޢާރަފްކުރުމުގެ މަސައްކަތް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ފަށައިފިއެވެ. 

ދާޚިލީ ވުޒާރާއިން ތަޢާރަފްކުރުމުގެ މަސައްކަތް ކުރަމުންދަނީ "ޝޯޓްކޯޑް ލައިން" 911 އެެވެ.

އެ ނަމްބަރަށް ގުޅުމުން ކަމާ ގުޅޭ އިދާއިރާތަކުން ވަގުތުން އެހީތެރިކަން ފޯރުކޮށްދޭ ގޮތަށް، ހަމަޖައްސަން ނިންމީ، ޞިއްޙީ ވުޒާރާއިން ރައީސް އޮފީހުގެ ސޯޝަލް ކައުންސިލަށް ހުށަހަޅައިގެންނެވެ. އެކަން ވީހާވެސް އަވަހަށް ފަށަން ކައުންސިލުން ވަނީ ފާސްކޮށްފަ އެވެ.

އެ ކައުންސިލުން ނިންމާފައި ވަނީ ޤައުމީ އިމަޖެންސީ ހާލަތްތަކުގައި ސަލާމަތާއި ރައްކާތެރިކަމުގެ ޚިދުމަތްތަކަށް އެއް ނަމްބަރަކުން ގުޅޭނެ ޤައުމީ ހެލްޕް ލައިން ގާއިމުކުރުމާ ގުޅޭ ކަންކަން، ދާޚިލީ ވުޒާރާގެ ދަށުން ކުރިއަށް ގެންދިއުމަށެވެ.

ކައުންސިލްގައި ނިންމާފައި ވަނީ ހެލްޕްލައިނަކަށް 911 ބޭނުން ކުރުމަށެވެ.

އެކަމަށް ޚާއްޞަކޮށް މިދިޔަ މަހު ބޭއްވި ބައްދަލުވުމުގައި ދާޚިލީ ވަޒީރު އަލީ އިހުސާނާއި ޚާރިޖީ ވަޒީރު ޢަބްދުﷲ ހަލީލާއި ކޮމިޝަނާ އޮފް ޕޮލިސް އަލީ ޝުޖާއުގެ އިތުރުން އެމްއެންޑީއެފްގެ އިސް ބޭފުޅުން ބައިވެރިވެވަޑައިގަތެވެ.

ދާޚިލީ ވަޒީރު އިއްޔެ ވަނީ އާސަންދަ އާއި އައިޖީއެމްއެޗްގެ އިތުރުން ވެސް ކަމާ ގުޅުން ހުރި އިދާރާތަކުގެ ބޭފުޅުންނާ ވެސް ބައްދަލުކުރައްވައިފަ އެވެ.