ﷲ އާއި އާޚިތަރްދުވަހަށް އީމާންވުމަކީ ކުރިއެރުމާއި ތަރައްޤީ އެކަމެއްގެ މައްޗަށް ބިނާވެފައި އޮންނަންޖެހޭ ދެއަސާސް: ވަޒީރު ޝަހީމް

ކުރިއެރުމާއި ތަރައްޤީ އެކަމެއްގެ މައްޗަށް ބިނާވެފައި އޮންނަންޖެހޭނެ ދެއަސާސަކީ ﷲއަށް އީމާންވުމާއި އާޚިރަތްދުވަހަށް އީމާން ވުން ކަމަށް އިސްލާމީ ކަންތައްތަކާއި ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ވަޒީރު ޝަހީމް މިހެން ވިދާޅުވީ ރާއްޖެ އިސްލާމްވި ދުވަހުގެ މުނާސަބާތުގައި މިއަދު ބޭއްވެވި ރަސްމީ ޖަލްސާގައި ވާހަކަފުޅުދައްކަވަމުނެވެ.

ވަޒީރު ޑރ ޝަހީމްގެ ވާހަކަފުޅުގައި ވިދާޅުވީ ހަނދާންކުރަންވީ ކަމަކީ އިސްލާމްދީނަކީ ދެދުނިޔޭގެ ފަލާޙާ ކާމިޔާބު އޭގައި އޮތް ދީން ކަމަށެވެ. އަދި ކީރިތި ޤުރުއާނުގެ ސޫރަތުލް ޢަޞްރުގައި ކާމިޔާބު މީހަކަށް ވުމަށް ބޭނުންވާ ސިފަތައް ގެންނަވައިފައިވާ ކަން ވަޒީރުގެ ވާހަކަފުޅުގައި ފާހަގަ ކުރައްވިއެވެ. 

އެގޮތުން ވަގުތުގެ ބޭނުން ހެޔޮ ގޮތުގައި ހިފުމަށާއި، ހެޔޮޢަމަލުތައް ކުރުމަށް ވަގުތުގެ ބޭނުން ހިފުމަށް އަވަސްވެގަތުމަށް އެސޫރަތުގައި ބުނެދީފައިވާ ކަމަށް ވަޒީރު ވިދާޅުވިއެވެ. އަދި ސަލާމަތްވާނެ މީހުންގެ ވާހަކަގެންނަވައިފައިވާ ކަމަށާއި އެގޮތުން އީމާންވެ ހެޔޮޢަމަލު ކޮށް ޙައްްޤަށް ވަޞިއްޔަތް ކޮށް ކެތްތެރިވުމަށް ވަޞިއްޔަތް ކުރައްވައިފައިވާ ކަމަށް ވަޒީރު ވިދާޅުވިއެވެ. 

“އިންސާނުންގެ ތެރޭގަ، އާދަމުގެ ދަރިންގެ ތެރޭގައި ކާމިޔާބަށް ވާސިލް ވެފައިވާ އުންމަތް ތަކުގެ ހުރި ސިފަތައް މިސިފަތަކަކީ” ވަޒީރު ޝަހީމް ވިދާޅުވިއެވެ.

ވަޒީރު ޑރ. ޝަހީމް ވިދާޅުވީ އެކިއެކި އުއްމަތްތަކުގެ ވާހަކަ އެކިއެކި ޙަޟާރަތްތައް ﷲ ޢައްޒަވަޖައްލަ މި ބިންމަތީ ލެއްވި ވާހަކަ ތަކާއި، އެޙަޟާރަތްތައް ނެތިވެގެން ދިޔަ ސަބަބުތައް އަޅުގަނޑުމެންނަށް ކީރިތި ޤުރުއާނުން ފެންނަށް އެބެއް ކަމަށެވެ.

އެގޮތުިން ޝުޢައިބް ޢަލައިހިއްސާލާމްގެ ޤައުމުގެ ވާހަކަ ގެންނަވަމުން ވަޒީރު ވިދާޅުވީ، އެކަލޭގެފާނުގެ ޤައުމަކީ ވިޔަފާރީގައި އިންތިހާއަށް ކުރިއަރައިފައި އޮތް ޤައުމެއް ކަމަށާއި ނަމަވެސް އެޤައުމުގެ މީހުންވީ ވިޔަފާރީގައި އިންތިހާއަށް މަކަރުހަދާ އޮޅުވާލާ ބައެއް ކަމަށާއި އެބައި މީހުން ކައިބޮއި އުޅުނީ ޙަރާމެއް ޙަލާލެއް ބެލުމެއް ނެތި ކަމަށެވެ.

 އަދި އެޤައުމު ހަލާކުވެ ނެތިދިޔުމުގެ ސަބަބަކަށް ވެގެންދިޔައީ އެކަން ކަމަށްވެސް ވަޒީރު ވިދާޅުވިއެވެ.

ދެން އަމަނިކުފާނުގެ ވާހަކަފުޅުގައި ގެންނެވީ ޞާލިޙްގެފާނުގެ ޤައުމުގެ ވާހަކައެވެ. އެގޮތުން އެޤައުމަކީ ޢުމްެރާނީ ގޮތުން ކުރިއަރައިފައި އޮތް ޤައުމެއް ކަމަށާއި، އެގޮތުން ފަރުބަދަ ކަނޑައިގެން ވަރުގަދަ އިމާރާތްތައް ބިނާ ކުރުމާއި ވަރުގަދަ ކާރުޚާނާތައް އަޅައިގެން އުޅުނު ބައެއް ކަމަށް ވިދާޅުވިއެވެ.އަދި އެބައިމީހުން ކުރިއަރައިދިޔަ ގޮތުގެ ވާހަކަ ކީރިތި ޤުރުއާނުގައި މާތްﷲ ގެންނަވައިފައިވާ ކަން ވަޒީރު ޝަހީމް ފާހަގަކުރެއްވެވެވިއެވެ.

އެވަރުގަދަ ކަމާއި އެކުވެސް އެ ޙަޟާރަތު ހަލާކުވެގެން ދިޔައީވެސް ދެކަމެއް ޤަބޫލު ނުކުރުމުގެ ސަބަބުން ކަމަށް ވަޒީރު ވިދާޅުވިއެވެ. 

“މިހުރިހާ ޙަޟާރަތެއް ހަލާކުވެގެން ދިޔައީ ކީއްވެގެން، އެމީހުން ދެކަމެއް ޤަބޫލު ނުކުރީ އެމީހުން ﷲއަށް އީމާން ނުވީ، ރަސޫލު ބޭކަލުންގެ ރިސާލާތުތައް އެބައިމީހުންގެ ގާތައް އައީ، އެހެން ނަމަވެސް އެމީހުން ﷲއަށް އީމާން ނުވީ، ދެވަނަ ކަމަކީ އާޚިރަތް ދުވަހަށް އެމީހުން އިންކާރުކުރީ، މި ދެސަބަބަކާއި ހުރެ އެމީހުންގެ ޙަޟާރަތްތައް ހަލާކުވެގެން ދިޔައީ” ވަޒީރު ޝަހީމް ވިދާޅުވިއެވެ.

ވަޒީރު ޑރ ޝަހީމް ވިދާޅުވީ ދުނިޔޭގެ އެއްވެސް ޚަޟާރަތަކަށް އިސްލާމީ ޙަޟާރަތައް ނޫނީ ދީނަކާއި ގުޅުވައިގެން ނަންދެވިފައި ނުވާ ކަމަށެވެ. އެހެން ޙަޟާރަތްތަކަށް ޤައުމިއްޔަތުގެ ނަމުން ނަންދެިވފައި ހުރެދާނެ ކަމަށާއި، ދީނަށް ނިސްބަތްކޮށް ނަންދެވިފައިވަނީ ހަމައެކަނި އިސްލާމީ ޙަޟާރަތައް އެކަނިކަމަށެވެ.

އެކަން އެހެންވަނީ އީމާންކަން ޤަބޫލު ކޮށްގެން ތިބެ، އާޚިރަތް ދުވަސް އަންނާނެކަން ޤަބޫލުކޮށްގެން ތިބެ މުސްލިމުން އެކި ދާއިރާތަކުން ކުރިއަރައިގެން ދިޔުމުގެ ސަބަބުން ކަމަށް ވަޒީރު ޝަހީމް ވިދާޅުވިއެވެ.

“އެހެންވީމަ އިޖްތިމާޢީ ޢިލްމާއި، ބޭސްވެރިކަމާއި، ފަލަކީ ޢިލްމާއި، ހިސާބު ޢިލްމާއި މި ހުރިހާ އިލްމު ތަކެއްގެ ފައުންޑަރުންގެ ގޮތުގައި މުސްލިމް މުފައްކިރުންނާއި ފަލްސަފާވެރިނާއި އިލްމުވެރިން އުފެދުނު، އަދި ޔޫރަޕްގަ މިއަދު ފެނިގެން މިދާ އުފެއްދުން ތެރިކަމުގެ ޚަޟާތަރުގެ ވަރަށް މުހިންމު އެއް ޚިއްސާ ދާރަކީ އަންދަލުސް ނުވަތަ ސްޕެއިންގައި އޮތް އިސްލާމީ ޙަޟާރަތުކަން މުވައްރިޚުން ވަރަށް ސާފުކޮށް ބަޔާންކުރޭ، އެހެންވީމަ، އާޚިރަތް ދުވަހަށް އީމާންވުމާ ﷲއަށް އީމާންވުމާއި މިދެއަސާސް މީ ކުރިއެރުމާއި ތަރައްޤީގެ ތެރޭގައި ޤާއިމްވެފައި އޮންނަންޖެހޭ ދެއަސާސް، މިދެއަސާސް ނެތްނަމަ އެޙަޟާރަތެއް ކުރިއަރައެއް ނުދާނެ” އިސްލާމީ ވަޒީރު ޑރ ޝަހީމްގެ ވާހަކަފުޅުގައި ވިދާޅުވެފައިވެއެވެ.

މިޖަލްސާގައި އިސްލާމީ ކަންތައްތަކާއި ބެހޭ ވަޒީރު ޑރ ޝަހީމް ގެ އިތުރުން ދިވެހިބަހާއި، ތަރިކައާއި ސަޤާފަތާ ބެހޭ ވަޒީރު އާދަމް ނަސީރު އިބްރާހިމްވެސް ވާހަކަފުޅު ދައްކަވައިފައިވެއެވެ.